Lalnghinglova Mizoram chhim lamah

Lok Sabha inthlanpui awm tura Congress leh ZPM thlàwp mipui candidate Lalnghinglova Hmar chuan nimin khan Lawngtlai leh Siaha bakah, district pahnih chhunga khaw ṭhenkhat a tlawh a, Lawngtlaiah thuthar thehdarhtute a kâwm bawk.

Lalnghinglova Hmar chuan, thlan tlin a nih chuan MP fund bakah, hmun dang aṭanga Mizoram tana sum hâi luh dan dap a ngai pawimawh dawn tih sawiin, "Football-ah pawh thawhpui ṭha tak tak ka neihte nen thawkhoin, hnam dang hmelhriat kan neihte zarah kan hmuh phak loh tura kan ngaihte kan hmu thei. MP ka nih chuan, ka ṭhiante chu MP an ni ang a, Central Secretariat-te dawr theiin, PSU, corporate-te awlsam zawkin ka dawr thei dawn a, Mizoram tan ṭha hlâwk zawkin ka thawk thei dawn a ni," a ti.

BJP chungchangah Tetea Hmar chuan, "BJP kaihhruai NDA sorkar vangin Kristianna kaihhnawihah ram páwn aṭangin thawhlawm (donation) a rawn lut thei tawh lo. Mizo ngei Mizorama Pathian thuhril tura rawn lut turte an dang duh a ni. India hi Hindu rama siam hi BJP thil tum a ni," a ti a; an khingpui MNF chu BJP nena NDA-a thawkho an nih thu a sawi.

Lawngtlaia thuthar thehdarhtute'n autonomous district council (ADC) tana hmalak a tum dan zawhna chhangin Lalnghinglova chuan, "ADC-te'n danin chanvo a pek dawn loh an nei em, an chanvo tur ang pek si danin a phût anga tihhlawhtlin loh a awm em tihte kan zir ang a, an chanvo tur dik taka an chan ngei theihna atan theihtawp ka chhuah ang. Danin a pek an chanvo an chang ngei theihna atana hmalak hi ka mawhphurhna a ni," a ti.

Lalnghinglova Hmar chuan, Lok Sabha inthlan chu India rama roreltu tur thlanna a nih thu sawi nawnin, "Mizoram state-a sorkar laiin ṭha taka a thawhpui theih tur aiin, Central-a ruling MLA, sorkar laipuiin ṭha taka a thawhpui theih tur kan neih a pawimawh zawk a ni," a ti a; amah thlan tlin a nih chuan, ruling MP ni-a dinhmun ṭha taka a awm a beisei thu a sawi bawk.