Hnahthialah C Lalrosanga

Lok Sabha inthlan tura MNF candidate C Lalrosanga chuan nimin zing khan Hnahthiala PWD banglaah thuthar thehdarhtute a kâwm a; politics a luhchilh chu zau zawka Pathian rawng a bâwl theihna tur nia a hriat thu leh, Hnahthial chu district khawpui hmasawn chak tak an nih a beisei thu a sawi.

C Lalrosanga chuan, Hnahthial khua chuan hmabak êng tak an neia a hriat thu sawiin, "Mizoram sorkarin chak takin hma a la chhunzawm ang a, district puitling leh hmasawn chak tak mai kan neih thuai a beiseiawm. Hemi kawngah hian Mizoram sorkar hmalakna bakah, MP ka nih chuan Central sorkar scheme hrang hrangte district thar tur chhungah tluantling zawka a luh theih nan theihtawp chhuah ka tum a ni," a ti.

Politics a luhchilh ta chu Pathianin zau zawka rawng a bâwl theih nana kawng a hawnsakna nia a hriat thu sawiin Lalrosanga chuan, "MLA inthlanpui kan neihah mipuiin Pathian hnenah sorkar ṭha min pe turin kan dil a, kan dilna chu min chhang a, Pu Zoramthanga kaihhruai sorkar ṭha tak min a ni," a ti a; MNF sorkar chuan a din tirh aṭangin hna an thawk nghal char char niin a sawi.

MNF Candidate chuan, Mizote thlavang na zawka hauh a ngai nia sawiin, “Parliament chhungah kan sakhua kan vawnna leh chanchin ṭha kan hrilna kawngah te, kan dikna leh chanvo humhalhna kawngahte hmalakna tur tam tak a awm a, India ramah kan sakhaw rawngbawltute'n nêkchêp an tâwk fo. Chu'ngah chuan an thlavang hauhin theihtawp chhuah turin MP nihna aṭangin thil tam tak a tih theih dawn a, ṭan lak ka tum nasa hle a ni," a ti.

Citizenship Amendment Bill chungchangah C Lalrosanga chuan, MNF party leh Mizoram sorkarin CAB a duh lohna chiang takin a tilang tawh niin a sawi a; CAB chu Lok Sabha-ah put luh leh a niha pass tum a nih chuan a do zawngin a vote dawn thu a sawi bawk.