Kohhran duh dan kalhah Zorama puh

Mizoram Pradesh Congress Committee (MPCC) leh Zoram Peoples Movement (ZPM) chuan thuchhuah siamin, MNF president Zoramthanga chu Lok Sabha inthlan tura a campaign-naah thu mu hnu kai tho a, Rev.Chanchinmawia (L) thihna hman ṭangkai tumah an puh a, "Kohhran duh dan kalha vote a zawng hi ṭha kan ti lo," an ti.

MPCC-ZPM chuan, MNF President-in Thenzawl, Lamṭhuamthum leh Serchhip bazara MP election campaign a neihnaa a thusawiah, October 1, 2007-a Rev. Chanchinmawia thihna chungchang sawi chhuak a, politics khelh nan a tharthawh leh chu an dem tak zet thu an tarlang.

Congress leh ZPM-te chuan, Rev. Chanchinmawia thihna chungchang chu politics khelh nana hmang tawh lo turin Synod-in political party tin an ngen tawh a, Rev. Chanchinmawia nupui Rohmingliani pawhin a pasal thihna leh thih dan chu sawi lan ṭhinte chu thil hriat nuam lo leh rilru natna thlentu a nih avangin sawi ri tawh lo turin a ngen tih an sawi a, "Synod berin thuchhuah siama mahni inthat a nih an rin loh thu leh tualthi ngei nia an pawm ngheh tlat avangin kohhran invui dan pangngaia vui a ni," an ti.

Pawl pahnihte hian MNF President chu thu mu hnu sawi chhuak a, politics-a hamṭhatna hmuh tumna atana a hman avangin ngaihdam dil turin an phût a ni.