Covid-19 vei la awm belh lo

Zoram Medical College (ZMC) Covid-19 Laboratory-ah May 30, Inrinni khan mi 91-te swab sample endik a ni a, Covid-19 hripui an vei lo vek. Nimin khan mi 130-te swab sample endik leh a ni a, nizan khan result hriat hman beisei ni mah se, he thu ziah lai hian result hriat a la ni lo.

Inrinni khan State Referral Hospital (SRH)-ah mi 10 dah luh niin, state páwn aṭanga rawn hawte vek an ni a, Risk Ward-ah admit an ni. An swab sample pawh endik nghal niin, hripui an vei lo vek tih hmuh a ni.

Nimin khan Covid-19 vei rinhlelh thilah mi pasarih dah luh thar leh a ni a, anni pawh state páwn aṭanga haw hlimte vek niin, Risk Ward-ah an awm mek. An zinga pali chu nimin khan swab sample laka endik a ni a, result a la chhuak lo a; mi pathumte erawh chu vawiinah sample laka endik a ni ang.

SRH-a rinhlelh thila admit-te hi Covid-19 hripui an vei lo tih finfiah a nih hnuah inkhung hrang turin chhuahtir ṭhin an ni a; nimin tlai dar 5 thleng khan damdawi-inah mi 12 awmin, Risk Ward-ah mi pasarih leh Holding Ward-ah mi panga dah an ni.