Plastic Free City-ah AMC-in Aizawl puang dawn

Aizawl Municipal Corporation (AMC) chuan AMC Board of Councillors meeting thutlukna angin August 1, 2019 aṭangin Aizawl khawpui chu plastic ip hman lohna khawpui, Plastic Free City-ah puan a nih dawn thu leh plastic ipte hman khap a nih dawn thu an puang.

AMC commissioner Dr H Lalthlangliana chuan nimin khan Aizawl Press Club-ah thuthar thehdarhtute kâwmin, plastic hman lohna khawpuia Aizawl siam tum chungchanga AMC hmalaknate a sawifiah a; Plastic Free City atana Aizawl khawpui puan chu AMC BoC meeting, March 26-27, 2019 chhunga neihin an rel tih a sawi.

Dr H Lalthlangliana chuan, National Green Tribunal-in AMRUT hnuaia Smart City atana thlan khawpui 100-te October 2, 2019 aṭangin plastic free city ni vek tura thupek a lo chhuah tawh thu leh, Aizawl pawh Smart City atana thlan zingah a tel thu a sawi a, "Mipui leh sumdawngte an lo inrin lâwk theih nan khapna thupek hi khap ṭan a nih hma thla li, April 1-ah chanchinbuahte chhuah a ni. Khapna hian ram pawn aṭanga AMC chhunga plastic product lak luh pawh a huam dawn," a ti.

Commissioner chuan, The Plastic Waste Management Rules, 2016-in plastic product khap tura a tih chin chu micron 50 aia pan polythene ipte leh thil dangte a nih thu a sawi a, "Plastic Free City tih hian plastic product awm miah lohna khawpui tihna a ni lo a, danin khap tur a tih chin hlawhtling taka khapna tihna a ni," a ti a; khapna bawhchhiate hrem dan tur chipchiar chu AMC-in a la rél dawn tih a sawi.

H Lalthlangliana chuan, khapna mai bakah hian, inzirtirna lam ngaih pawimawh a nih dawn thu sawiin, plastic product-te hman tawh paih nghal mai loa hman nawn theih hman nawn te, hman hnu thil dang atana sawngbawlte leh plastic hman hrim hrim titlemte a pawimawh thu a sawi a, "Mizoram hi kohhran leh tlawmngai pawl ṭhatna, lehkhathiam tamna, VC/LC ṭhatna ber a nih avangin "Khapna hi a hlawhtlin theih kan beisei," a ti.

Commissioner chuan, plastic khap tur chungchangah hian state hrang hranga an kalpui dante zir chiangin AMC-in aiawh a tir mek thu te, khapna kenkawh kawngah local council, NGO leh pawl dangte hman ṭangkai tum a nih thute a sawi bawk.

AMC Commissioner sawi danin, India rama state 21-ah plastic lam chi khap pumhlum (total band) a ni tawh a, state pangaah tenau deuha khap (partial band) niin, Mizoram leh state dang pakuaah khap a la ni lo. AMC-in kum 2017-a zir chianna an neih danin, Aizawl khawpuiah ni tin plastic waste (bawlhhlawh) quintal li vel a ni.