MNF-in malsawmna ruai chawi hniam tum

MNF president Zo­ram­thanga chu nimin khan Lok Sabha inthlan atan Mizoram khawthlang lamah campaign in, West Phaileng, Kàwnmawi, Lallen, Saithah leh Phul­dungseiahte thu a sawi a; miretheite kîl phâkin malsawmna ruai chawi hniam an tum tih a sawi.

Zoramthanga chuan, MP inthlana an khingpui ber tur chu khawi party candidate nge a nih an hre lo tih sawiin, "Congress nge, ZPM candidate a nih pawh a hriat loh. Vawi khat pawh la minister lo kha chief ministerial candidate leh super CM nih tum ang vel khan, mipui ráwn si loin 'Mipui Candidate' an vuah ta mai mai a ni," a ti.

An khingpuite chuan MNF party leh an candi­date beihna an hre lo nia sawiin Zorama chuan, "An sawi ber CAB chung­changah lah kan hma­lakna chanve, chanve leh pawh hmalakna an nei ve lo. MNF anga CAB do nasa leh bei nasa an awm ve lo," a ti a; a tirah Central-a Congress duh lo intélkhawm NDA-ah Lalduhoma te chu MNF aiin an tlatlum zawk niin a sawi.

Zoramthanga chuan, MNF MP candidate C Lalrosanga chu a hna­thawh tawhna vanga Par­liament-ah pawh ex­perience nei ṭha a nih thu sawiin, "Pathian ṭih mi leh rawngbawltu a ni a, kohhran mite'n ram hruai tura kan ṭawngṭaina Pathian chhanna a ni thei," a ti.

MLA inthlan laiin Tuipuibari leh Marpara thlengin campaign-a a kal thu sawiin, "Kawng chhiatzia a taka hmutu ka ni a, hmalakna tur a tam hle tih ka hria. Ṭhenkhat chuan kan sorkar thla hnih thum leka Congress pawisa hman bânga hna kan thawh hi Congress kum 10 sorkar ai pawha thawk ṭhaah, an kawtkaia hnathawh an hmuh nghal theih avangin an sawi a ni," a ti a; budget pui an hman hunah nasa taka hna an thawk dawn thu a sawi.