MNF candidate a tlin chuan Kristian tiduhdahtute kan ṭanpui tihna - Hawla

Mizoram Pradesh Congress Committee (MPCC) president Lal Thanhawla chuan, Lok Sabha inthlanpui awm turah MNF candidate a tling a nih chuan Mizo­ram mipuiin Kristian tiduhdahtute an ṭanpui tihna a nih tur thu a sawi.

Lal Thanhawla hian nimina Congress Bha­van-a political session-ah thu sawiin, "Naktuk maia MP inthlanpui neih tur hi Kristiante tan chuan indona thianghlim ang a ni a, MP atana MNF candidate hi a tling a nih chuan Kristian tiduh­dahtute kan ṭanpui tihna a ni ang," a ti.

Lok Sabha inthlanah MPCC leh ZPM ṭang­rual leh MNF-in candi­date an inneih ṭhat hleih em avangin MNF lamin an candidate fak ngaihna an hre tawh lo tih sawiin Hawla chuan, "MNF candidate hi zai­khawmnaa a lám su zuk zuk ṭhinte khan chhan a lo nei vek a, mipui lamin a chanchin an lo hriat vek si avangin a boruak a sang hlei thei ta lo a ni," a ti a; MNF-te chuan an candidate boruak a san theih loh avangin mipui candidate pawh hniam tumin PRISM candidate an infak siak mek tih a sawi.

Lal Thanhawla chuan, Citizenship Amend­ment Bill (CAB) chungchangah, "MNF hian CAB hi an dodal ve tak tak a nih chuan BJP nena an inzawm mekna NDA hi an chhuahsan tur a ni. An zinga ṭhu reng chungin a do tak tak theih loh. Mizoram mipui hi hetiang mai maia bum theih kan ni lo," a ti.

MNF-in an belh ber BJP chu an tliak mek a, ram pumah nasa takin an tlahniam mek tih sawiin Lal Thanhawla chuan, "An mangangin sum leh pai nasa taka vawrh an tum a, state ṭhenkhatah chuan an sum sem tur vaibelchhe tam tak an mansak hial," a ti a; Mizoramah pawh Congress paih turin Mizoram BJP ring zo loin MNF an pui niin a sawi.

MPCC President chuan, mipuiin Central lamah BJP sorkar tla ngei se an duh vek tawh nia sawiin, a chhan hrang hrang a sawi a, "MP elec­tion kan hmachhawn tur hi keini Kristiante tan chuan indona thianghlim ang a ni. BJP sorkar hnuaia Kristiante nasa taka nêkchêpin kan awm a, missionary-te'n harsatna an tawh nasatziate ngaihtuahin, BJP thláwptu MNF candidate hi Kris­tiante tan cuan thlan tlin chi a ni lo," a ti.