State lottery-a corruption ti ṭanah Lalduhoma'n MNF sorkar a puh
ZPM leader Lalduhoma, MLA chuan, MNF party-in eptu pawl an nih laia Mizoram state lottery kalpuitu duh loa State Lottery pisa an dan phahna lottery agent-te chu tuna MNF sorkarin dan kalhin rawih a tum leh mek tih a sawi a; MNF sorkar chu corruption-a inhnamhnawih nghalah a puh.
Lalduhoma hian nimin khan ZPM pisaah thuthar thehdarhtute a kâwm a; Congress kaihhruai sorkarin kum May 29, 2012 aṭanga May 29, 2018 thlenga agent-a a hman - M/s Teesta Distributors, M/s NV International, M/s Summit leh M/s E-Cool Gaming Solutions-te chu MNF party-in eptu an nih laiin nasa takin an sawisel tih a sawi.
Lottery distributor thlan danah te, agreement pawhseiahte induhsakna uchuak tak a awmah MNF party-in an ngaih avangin nasa takin an aupui tih sawiin Duhoma chuan, "Lottery office pawh an hual hial. Congress sorkar chuan July 9, 2018-ah lottery chu a vaiin a titawp (suspend) ta vek a, tun thlengin sorkarin lottery aṭangin sum a la lut rih lo," a ti.
Lalduhoma chuan, MNF sorkar tharin lottery bawk chu ngaih pawimawh hmasakah a nei tih sawiin, "Congress sorkar laia nasa taka an sawiselte tho kha duhsakna hlan an tum leh mek. March 15, 2019 khan State Lottery Committee koh a ni a, sorkar hmasaa cancel tawh distributor palite bawk agreement siampui turin thutlukna siam a ni," a ti a; agreement siam tur chu September 2019 thleng tura tih a ni a, 'A ṭul a nih chuan, distributor-te nena inbe remin pawhsei theih a ni ang' tih a tel thu a sawi.
ZPM Leader sawi danin, lottery distributor pali zinga pakhat E-Cool Gaming Solutions chu an inhnûkdâwk a, chuvang chuan an chanvo - draw paruk chu distributor dang pathum hnenah sem tura tih a ni. Lottery chungchanga rawtna leh agrrement tur hi a taka ziah la ni lo mah se, Chief Minister-in a pawmpui tawh.
Lalduhoma chuan, Congress sorkarin July 9, 2018-a lottery a vaia a tihtawp tawh avangin distributor palite leh Mizoram sorkarin agreement an siam pawh a thi vek tawh tih sawiin, "Tihnun leh chi a ni tawh lo. Lottery hi MNF sorkarin an ti leh duh a nih chuan, a tharin tender/IEI (Invitation of Expression of Interest) a ko leh tur a ni. Tender loa distributor thlan hi dan kalh tlat a ni a, Supreme Court ruling tam tak a awm," a ti a; Election Model Code of Conduct hman mek bawhchhiatna a nih bawk thu a sawi.
ZPM Leader chuan MNF sorkar chu dan leh hrai zawng zawng palzûtah puhin, lottery chungchanga hma an lakna chu tihtawp an phût tih a sawi a, "Namenloa an sawisel agency pangngai bawk rem leh rem lo chunga duhsakna uchuak tak pek tumtu MNF sorkar hian principle an neih lohzia leh corruption nena bul an ṭan lehzia a tilang chiang hle," a ti.