Dâwt sawi tawh lo turin Zorama chah; NDA sorkar loh nan MPCC-ZPM thawkho

ZPM leader Lalduhoma chuan, state pakhat chief minister tan dâwt sawi a inhmeh lo tih sawiin, MNF president leh chief minister Zoramthanga chu National Democratic Alliance (NDA)-a ZNP tel leh tel loh chungchangah dâwt sawi tawh lo turin a chah. ZPM leh Congress thawhho chhan ber chu - Narendra Modi kaihhruai BJP/NDA an sorkar tawh loh nan a nih thu a sawi.

Lalduhoma hian nimina ZPM pisaa thuthar thehdarhtute a kawmnaah, kumin March thlaa Assembly House-a budget session-ah CM Zoramthanga'n ZNP chu NDA la zawm reng anga a sawi avangin House-ah vek a sawifiah nghal tih a sawi a, "ZNP chuan July 8, 2016-ah NDA kan chhuahsan tawh thu ka sawi. CM chuan, 'A lo nih tak chu maw le, tunah kan hre ve chauh atin a nia' tiin a phá a. Keiin, 'In va bengvár lo deuh ve maw le, tun chinah chuan in lo chiang ve tawh dawn nia,' ka ti a ni," a ti.

Assembly House chhungah ngei ZNP-in NDA an chhuahsan tawh tih a sawi a, CM Zoramthanga pawhin chiang taka a hre tawh chungin Zoramthanga chuan tun thlengin ZNP chu NDA-a la tel angin a sawi zui zel tih a sawi a, "Tun thlengin Chief Minister hian thu dik hre reng chungin dâwtin min la puh lui ta zel a, CM meuhin hre reng chunga dâwt sawi hi a inhmeh lo a, sim rawh se," a ti a; Mizoramah MNF chiah tuna NDA zawm mektu an awm thu a sawi.

Citizenship Amendment Bill (CAB) chungchangah Lalduhoma chuan, Union minister of state Kiren Rijiju-a'n CAB tharthawh leh a nih pawhin, India hmarchhak a huap dawn lo anga a sawi chu "MP-ah a tlin leh theihna tura a campaign au hla ve a ni a, innghahna tlak a ni lo. NDA chairman leh BJP president Amit Shah-a'n 'Kan sorkar chuan CAB kan pass ang' a tih kha a la ding reng a, a hlauhawm ngaiin a la hlauhawm reng a ni," a ti.

ZPM Leader chuan, Narendra Modi-a sorkartir leh chu kohhranho duh loh zawng a nih thu leh missionary-te hlauh ber a nih thu sawiin, "Kristiante tan BJP/NDA an sorkar tawh lohna tura beih hi a him ber, sorkar lo turin kan duh," a ti a; Modi-a leh NDA an sorkar tawh loh nan theihtawp chhuahin an ṭang tlang tih a sawi.

Lalduhoma chuan, BJP an sorkar tawh loh nan state dangah pawh party inhal tak takte an thawkho mek tih sawiin, "Congress hian ZPM hi ṭha min tih em avangin min thawhpui a ni lo, ZPM pawhin Congress hi an sorkar laia an tih zawng zawng a ṭha kan tih vanga thawhpui kan ni lo. Modi-a prime minister a nih leh theihna turin MNF-in an thawhpui si a, a mala kan beih chuan kan hneh lo ang tih kan hlau a, tun hi ṭan tlan hun a ni e, tiin kan thawk tlang a ni mai. Kan flag leh kan symbol dahṭha a, kan ram tan kan in surrender a ni," a ti.

ZPM Leader chuan, NDA chu parliamentary party a nih thu leh NDA-ah chuan BJP MP ni lo party dang MP 54 an awm mek thu sawiin, "An vaiin parliamentary party an ni tlang vek, whip pakhat kaihhruainain an awm. MNF candidate hi a tlin chuan NDA parliamentary party a zawm dawn hrim hrim... NDA an zawm tlat a ni," a ti a; MNF chu NDA chhungah an luh avangin BJP chu thui takin an do thei lo tih a chian sa thu a sawi.

BJP/NDA duh loh chhan a sawi dangte
1. BJP agenda - Hindutva an kalpui zual avangin.
2. Uniform Civil Code kalpui an tum zui avangin
3. Kohhran leh NGO-te'n ram dang aṭanga puihna an dawn an tihtawpsak vangin.
4. Hindu lehkhabu thianghlim Baghavat Gita chu National Book of India-a puan an tum vangin.
5. Christmas ni Good Governance Day-a an hman vangin.
6. Good Friday chu Digital India Day-a an puan avangin.
7. University-ah vice chancellor atan RSS ruhkawl hlîr an dah vangin.
8. Central sorkara zirna-inah Yoga leh Sanskrit an zirtir luih vangin.
9. NDA sorkar hnuaia Kristiante nêkchêpna hluar zel a tawp theih nana kohhranin inthlan thuchhuah an siam chu Kristiante'n an zawm ngei tur nia an hriat vang.
10. India rama kohhran tin leh Kristiante hlauh ber chu BJP/NDA sorkar a ni.
11. Mission field zawng zawnga thawktute'n NDA sorkar leh an hlau ber.