MZP hruaitute'n Lok Ayukta Chairman kâwm

MZP Gen.Hqrs. hruaitute chuan nimin khan Mizoram Lok Ayukta chairman C Lalsawta a pisaah an hmu a, Lok Ayukta chungchang leh a kaihhnawih thil chi hrang hrang an sawipui.

C Lalsawta chuan, MZP hruai­tute leh mi dang ṭhahnemngaite vanga Mizoram sorkarin Lok Ayukta a tipuitling ta chu lawmawm a tih thu sawiin, an kal zelna turah fin­chhuah a mamawh dawn thu a sawi a, "Lok Ayukta hi a nihna tur takin Mizo mipuite'n an hman thiam a ngai a, a ṭangkaina ang taka hman a nih theih nan Mizo mipui hnenah zirtirna nasa tak pek a ngai a ni," a ti.

Lok Ayukta Chairman chuan, Mizoramah eirûkna leh dan loa sum tam tak chingpen a awm a rin thu sawiin, "Thil tisualtu chu hrem mai tur an ni a, mahni tihsual ni lo, an hnuaia mite tihsual vanga tuar pawh tam tak an awm thei ang, chungte chu Lok Ayukta hmanga chang zawka hai lan zel a nih theih ka beisei," a ti a; a duh ber chu eiru leh thil tisual hrem ringawt ni loin, eiru lo tura Lok Ayukta kaltlanga mipui zirtir leh Mizote siamṭhat a nih thu a sawi.

MZP chuan, Mizoramah Lok Ayukta a taka kalpui a nih theih nan kum 2012 aṭangin hma an la ṭan tih an sawi a, "Kum 2014 Assembly session-ah Lok Ayukta pass a ni a, kum 2019-a din a ni ta hi lawmawm kan ti hle a ni. Thawktu leh thil dang tam takah mamawh a la tam hle a, a nihna tur ang taka Lok Ayukta hman a nih theih nan a ṭul angte leh dah belh thuai turin thuneitute kan ngen a ni," an ti.

Lok Ayukta pisaah hian thawktu regular staff pakhat (chairman) leh muster roll driver pakhat, muster roll data entry operator pakjhat-te an awm mek a ni.