Fa nei tamte hnenah chawimawina hlan

YMA Sub-Hqrs. Serchhip chuan nimin khan Serchhip P&E Veng YMA Hall-ah Rorel Inkhawm vawi hnihna an hmang a; an huam chhunga fa nei tam, fa paruk aia tam nei mi 17 hnenah chawimawina an hlan.

Sub-Hqrs. YMA conference neih loh kuma neih ṭhin rorel inkhawm­ah hian rorel palaite'n Sub-Hqrs. YMA president R Sanghmingthanga kaihhruaiin ro an rel a; YMA khawih agenda paruk leh sorkar khawih agenda pathumte an pawm vek.

Agenda pass zingah hian - lui dung leh lui dunga nungcha humhalh kawnga chak zawka hmalak rawtna te, zu leh ruihhlo dona kawnga nasa zawka hmalak rawt­na te, all India service leh central service dangah Zo fate a tam thei ang ber an luh theih nana CYMA anga hmalak rawtna te, hnam incheina (Zo puan hrang hrang) humhalh kawnga inzirtirna zau zawk neih rawtnate a tel.

Chawhnu lama vantlang inkhawmah CYMA president Vanlalruata'n thupui, ‘Ram leh hnam humhalh’ tih a sawi. Inkhawmah hian Mizote an pun leh zual theihna tura inzirtirna atan kum kal ta chhunga Serchhip Sub-Hqrs. YMA huam chhunga fa paruk nei chin, an fa naupang ber kum 2018-a piang mi 17 hnenah chawimawina an hlan a; nikum lamah pawh fa nei tamte hnenah chawimawina an lo hlan tawh a ni.

Serchhip Sub-Hqrs. YMA hnuaiah hian YMA branch 77 leh group YMA pathum a awm a, member 23,154 an awm mek a ni.