Chaw, sa leh thlaiahte Intodelh thei tur kan ni - CM

Chief minister Zoram­thanga chuan May 30, Inrinni khan Lengte Piggery Village a tlawh a; Mizoram chu chaw, sa leh thlaiah intodelh ngei ngei thei tur a nih thu a sawi.

Covid-19 hripui vangin sorkar hmalakna kal mek ṭhenkhat chawlh lailâwk rih ngai a awm thu sawiin Zoramthanga chuan, "Kal­phung thlak ngaite a awm a, chuti chung chuan sum neih sa a hlâwk thei ang bera hmangin, ram a intodelh theihna turin 

ṭhahnemngai taka thawh zui zel a ṭul. Kan ram leilung, sik leh sa leh tui awm dan ngaihtuahin chaw, sa leh thlaiah into­delh ngei thei kan ni," a ti.

Chief Minister chuan, Covid-19 vangin SEDP hnuaia ran vulh tih­hma­sawnna tura rua­hmanna lo siam tawh chu tihdanglam a nih thu sawiin "Category thumah ṭhenin, beneficiary tlem zawkin hmalakna lian tham zawka kalpui tum a ni," a ti a; ṭhahnemngai tak takte hnenah puihna pe turin ruahman a nih thu a sawi. 

Mizoram hmasawn turin infrastructure bakah, ei tur chaw, thlai leh saa kan intodelh hmasak a pawi­mawh tih sawiin CM Zorama chuan, "Covid-19 hian mahnia kan intodelh a ṭulzia a takin min zirtir a ni," a ti.

CM Zoramthanga chuan, AH&Vety department hnuaiah mipuiin sa thianghlim an mamawh tih sawiin, "Piggery village hi mi dangte tana entawn tura insiam zel tura beisei a ni," a ti a; farm neitute'n theihtawp an chhuah a pawimawh thu a sawi.

Chief Minister hi AH&Vety minister Dr K Beichhua, Ve­terinary and Fishery Board vice chairman C Lalmuanpuia, MLA leh bialtu MLA H Lalzirlianate'n an ṭawiawm a ni.

Lengte Piggery Village-ah hian vawk vulhna hmun bik (cluster) siam a ni a, vawk vulh tak tak turte ṭanpuina tur Invention Towards Pig Productivity Enhancement Through Entrepreneurship Deve­lopment siam a ni. Kum 2018-19 aṭangin cheng nuai 391 hmangin hmalak ṭan a ni a, vawk 850 chuang a awm mek. Project cost-ah beneficiary/entrepreneur thlan chhuahte chuan 25% tumin, state sorkarin 75% a tumsak thung.