Doctor-te'n RT-PCR kháwlin Mi tam zawk endik an duh

Health minister Dr R Lalthangliana hoin May 30, Inrinni khan Disaster Management & Rehabilitation (DMR) mi­nister Lalchamliana, Medical Operational Team chairman Dr ZR Thiam­sanga, chief secretary Lalnunmawia Chuaungo, Indian Medical Association (IMA), Mizoram Govern­ment Doctors’ Association (MGDA) leh Non-Govern­mental Hospital Association of Mizoram (NGHAM) aiawhte an ṭhukhawm. Doctor-te chuan, RT-PCR kháwl hmangin mi tam zawk endik theih ṭul an tih thu an sawi.

IMA, MGDA leh NGHAM aiawhte chuan, khawvel pumpui bakah, India ram leh ṭhenawm state pathum - Assam, Tripura leh Manipur-ahte Covid-19 vei an pun chak dan thlîr chung leh Mizoram mi sing khat chuang rawn haw mek leh rawn la haw tur an la awm avangin inkhàrkhip kalpui chhunzawm ṭha an tih thu an sawi a ni.

Rapid antibody test (RAT) chu ṭangkai viau mah se, RT-PCR (Reverse transcription polymerase chain reaction) kháwl hmanga tam zawk endik a nih theih nan hmalak ṭula an hriat thu sawiin doctor-te chuan, "ZMC-ah chauh Covid-19 Testing Laboratory a awm avangin hmun kilkhâwr leh hla zawka sample test tura lakte rang tak taka hriat a nih theih nan RT-PCR khawl lei belh a, district hospital-a dah turin ruahmanna siam a ṭul," an ti.

Health minister Dr R Lal­­thang­liana chuan, Covid-19 do kawngah Chief Minister kaihhruaina hnuaia Mizoram sorkar inpuahchah dan chu a chhuanawm thu a sawi a, "Kan inthlahdah hauh loh a ṭul. Hri léng hian eng chen nge min chàm chilh dawn a hriat loh a, a lo berah July thla tàwp thleng hi chuan kan la buai dawn niin a lang," a ti. 

Sorkar hnathawk, tlawmngai pawl leh mipui an hah tlang hle tawh a, thuneitute tan rorel thiam a har tih sawiin Health Minister chuan, "Vawiin anga kan thurèl ṭha tak nia kan hriatte pawh a tûk lawkah a lo ṭangkai lo leh mai ṭhin a, a harsa tak zet a ni," a ti a; hah taka thi leh thau pawlha ngaihtuahna séngtute an zahawm thu a sawi.

Dr R Lalthangliana chuan, Covid-19 dona kawnga theihtawp chhuahtute zawng zawng chungah lawmthu sawiin, "Covid-19 hian kan nunphungah a ṭha lamin nghawng nei thei ngei se a duh­awm. Mipuite chîâi lo a, fimkhur tak sia awm tura zirtir an pawimawh. Chumi atana thawktu media hrang hrangte inpekna a lawmawm ka ti hle a ni," a ti.

DMR minister Lalchamliana chuan, sorkar laipuiin State Disaster Response Fund (SDRF)-ah cheng vbc. 23.5 Mizoram a pek thu sawiin, "Hemi aṭanga 35% chu Covid-19 dona atan hman a phal a, 10% chu Covid-19 dona tur bungraw lei nan hman phal a ni," a ti a; RT-PCR leina turin a kaihhnawih department-in ruahmanna an siam chuan hman theih a nih tur thu a sawi.