YMA Day puala CYMA ngenna
Central YMA chuan kumin 2020-a YMA Day, June 15-a lo thleng tur pualin thuchah leh ngenna a tichhuak a; Khua/veng chhunga mi harsa leh chhumchhiate dap chhuak a, a theih ang anga chhawmdawl turin YMA branch-te a ngen. Hetih lai hian, kumina thuchahah hian kum hmasa lama thuchaha telh ziah ṭhin, thisen pek chungchang erawh telh a ni lo.
Central YMA chuan, khawvel ram hrang hranga Covid-19 hripui léng vangin kumin YMA Day chu kum dang angin hman theih a ni dawn loa a lan thu a tarlang a; chutih rualin, YMA Day lo thleng turah a hnuaia tarlante hi hre turin YMA sub-headquarters, group leh branch-te a ngen a ni.
Central YMA ngenna
1. YMA Day-ah hian mahni huam chhung ṭheuhah YMA flag a tam thei ang ber tàr ni se.
2. YMA Day 2020 thupui atan ‘Zirna uar’ hman ni se.
3. YMA hi ṭanpui ngaite ṭanpui ṭhintu a nih angin, veng/khaw chhunga mi harsa leh chhumchhiate dap chhuak a, a theih ang anga chhawmdawla ṭanpui ni se.
4. Faina leh thianghlimna hi YMA-te'n kalphung ngheta kan lo neih tlat tawh angin, he ni denchhen hian a theih ang anga veng chhung thenfai hna thawh ni se.
5. YMA sub-hqrs, group leh branch-te'n a remchan dan azirin hospital/home/centre-ahte ṭanpuina thilpek hlan ni se. YMA in, library, lungphun, signboard leh thil dangte tuaithar leh ni se.
6. A theih ang angin ṭhangtharteah tlawmngaihna leh Mizo thuam inbel uar inzirtir thar leh nan hman ni se.