Eirua puhna thubuaiah CM Zorama leh mi dang 3-te'n thiam an chang. "Roreltute'n dikna hmangin an rél" - Zorama

Chief minister Zoramthanga, Agriculture minister hlui leh Planning Board vice chairman ni mek H Rammawi leh mi dang pahnihte chu eirua puhna thubuaiah Aizawl District Court-a Special Judge (Preven­tion of Corruption Act) chuan nimin khan thiam a chantir.

Thubuaiah hian Special Judge (PC Act) Vanlalenmawia chuan nimin khan thutlukna - judgement order a puang a, thutlukna puan lai hian chief minister Zoramthanga chu Court-ah a inlan a ni.

Special Judge chuan, finfiahna hrang hrangte thlirin, Zoramthanga, H Rammawi, Lalhuapzauva leh KK Shah-te chu an eiru a ni tih finfiahna a hmuh loh thu a tarlang a, "IPC Section 120B leh PCT Act, 1988 Section 13(1)(c) leh Section 13(1)(c) hnuaiah an eiru a ni tih prosecution-in an finfiah lo a, chuvang chuan zah tak chungin chhuah zalen an ni," a ti.

Court-in thutlukna a puan zawha thuthar thehdarhtute zawhna chhangin Zoramthanga chuan, "Dik lo taka puhin kan awm a, chu chu roreltute'n dikna hmangin an rél a, thiam min chantir ta a. Chuvangin, honourably-in tunah chuan thiam kan chang ta," tiin a sawi.

A thubuai chu politics-a phuba lâkna (political vendetta) a nih thu a lo sawi tawh chungchanga zawhna chhangin Zoramthanga chuan, "A base-ah chuan a dik," a ti.

Judgement & Order-a a lan danin, Zoramthanga s/o Dar­phunga (L), Ramhlun Venglai, H Rammawi s/o Saithiauva (L), Tuikual 'A', Lalhuap­zauva s/o Suakchhunga, Bungkawn Damveng leh Khrishna Kumar Shah s/o Rampal Shah (L), Bangur Avenue, Kolkata-te lakah Anti-Corruption Bureau (ACB) chuan IPC 120B/409/34 leh, PC Act 13(1)(c)(d) leh 13(2) tlawh­chhanin thubuai an ziak lut a ni.

H Rammawi hi MNF sorkar hmasak laia Agriculture minister a ni a, Lalhuapzauva chu adviser to chief minister niin, KK Shah chu Mizoram Venus Bamboo Product hotu a ni. Anni bakah, Hnahlan Grape Growers’ Society leh Champhai Grape Growers’ Society-a managing director Vanlalruata Chenkual hming a lang a, thiam chantirte hming ziah lanah a lang tel lo thung.

December 16, 2009-ah ACB additional SP LB Chhetri chuan Zoramthanga, H Rammawi, Lalhuapzauva leh Vanlalruata Chen­kual-te lakah FIR a theh­lut a ni. Court-in thubuai a ngaih­tuahnaah eirua puhte aiawhin an ukil W Sam Joseph leh sorkar aiawhin additional public prose­cutor C Lalrinchhunga te an ding a; date of framing of charge chu July 25, 2018 leh August 28, 2018 a ni.

Date of evidence of prose­cution tih ni tarlan chu March 4, 2019 leh February 10, 2021 inkarah a ni a, a vaiin ni 16 a ni. Date of statements u/s 313 CrPC chu February 17, 2021 leh March 4, 2021 a nih thu te, date of evidence of defence chu March 9, 2021 a nih thu te, date of argument chu March 22, 2021 a nih thute tarlan a ni bawk.

Court Judgement & Order-a a lan danin, Mizoram Intodelhna Programme (MIP) hnuaiah Agriculture department-in mipui sum (public fund) an pe chhuak a; chu'ngte chu Mizoram Venus Bamboo Product (P) Ltd. hnenah cheque hmangin July 7, 2006-ah cheng nuai 50, Hnahlan Grape Growers Society hnenah February 18, 2008 leh July 7, 2008-ah cheng nuai 83, Champhai Grape Growers Society hnenah July 7, 2008-ah cheng nuai 83 leh Mizo Organic Producers' Company Ltd. hnenah sum faiin Rs. 2,50,000-te a ni.

Agriculture depart­ment-in MIP hnuaia sum a pek chhuahte chu loan anga a pek chhuah a ni a, thla thum chhunga rulh tura tih a nih rualin, rulh hun chu thla ruk dang pawhsei theih a ni bawk.

MIP 2006 Guidelines-ah chuan, MIP hnuaia sum pek chhuahte chu MIP Apex Committee-in a pawmpui a ngaih bakah, Apex Committee Chairman (Chief Minister) tel lai ngeia pawmpui a ngai a; chutih laiin, sum pek chhuahte chu MIP Apex Committee-in Chairman (Chief Minister) tel loin, vice chairman (Agriculture minister H Rammawi) hoa an meeting-a thutlukna anga pek chhuah a ni thung.

Special Judge chuan nimina Court thutlukna a puannaah, eirua inpuhna thubuaiah hian sum eirukna a hmuh loh thu leh MIP hnuaia Agriculture department-in sum a pek chhuahte chu hman ngei a nih thu a sawi a; chutih rualin, MIP Guidelines ang taka thil tih a nih loh thu a sawi a ni.