Tuirial luiin chhan-chhuah a mamawh

Association for Envi­ronmental Preservation (ASEP) chuan thuchhuah siamin, Tuirial lui a chhe mek a, chhanchhuah a mamawh hle tih an tarlang. Thil awm dan a hmuna enfiah thuai tur leh lui leh a chhunga nungchate himna tura hma la thuai turin thunei­tute an phût.

ASEP chuan, Shivalaya Construction company-in Tuiriala balu an silna washing plant chu a hmunah an enfiah tih an tarlang a, "An hnathawhna hmun aṭangin an bawlh­hlawh zawng zawng Tuirialah a luang lut vek a, hei hian tui nú leh dûm kâwi, diak ban tak siamin, Tuirial lui a hnawhkhat vek a ni. Li thûk leh ṭha ni thin, luia nungchate chênna ber a hnawh khat vek a, luia nungchate tan nun khawchhuah ngaihna a awm lo," an ti.

ASEP tarlan danin, Tuirial khawtlangin an humhalh chin bik chu mihring tan pawha dài ngam loh khawpin dûmin a hnawh a, chu chuan Tuirial lui chu Tuirini nen an infinna thlengin a tinua hriat a ni. Tuirial Branch YMA pawhin ṭha lo an tih avangin complaint siam tawh mah se, tun thlengin awmzia a la nei lo.

Tuirial lui awm dan chu lungchhiatthlak an tih thu sawiin ASEP chuan, "Tuirial lui hian chhanchhuah a mamawh hle. Washing plant aṭanga bawlhhlawh lut avang hian Tuirial river ecosystem nasa takin a chhia a, chu chu luia nungchate tan chauh ni lo, mihring tan pawh a pawi tak zet. Hei hi a hmunah ngei enfiah turin thuneitute kan phût a ni," an ti.

An beisei anga hmalakna a awm loh chuan Tuirial lui chhanchhuahna hna thawk turin ASEP-in hma an la dawn tih an
tarlang bawk.