Serchhipah in pali a kâng ral

March 29, Thawhṭanni zan dar 10 rîk hma deuhin Serchhip Dinthar Venga Sesah lui kamah chenna in pali, Assam type vek a kâng a, bungrua chuh mumal hman awm loin a kâng ral a, mihring thi leh hliam an awm lo.

Serchhip Times editor Kapliana Pachuau hnen aṭanga thu dawn danin, kângmei hi R Van­ramnghaka in hnuai aṭanga chhuak ṭan a ni a, a kan chhan hriat a ni lo. Inah hian R Vanram­nghaka bakah a nupui Lalengkimi leh an fate pahnih Lalrinawmi leh Malsawmtluanga te an awm a, bungrua an chuh hman lo.

R Vanramnghaka in kâng chuan an ṭhenawma in, Hunlawmawma te chhungkaw luah lai a kâng kái a; Lalngaihzuai in, zirlai pakhatin a luah lai leh Sunatan Marandi te in luah lai a kâng kai bawk. In kan lai hian Sunatan Marandi te chhungkua chu rama an riah lai a nih avangin an awm lo.

Kângmei hi khaw­tlangin ṭhelh an tum a, kângṭhelh motor pawh an thleng har lo a, mahse, an ṭhelh thei lo a, zan dar 10:30 velah a kâng ral a ni.

Kângmei chhuahna hmun hi Serchhip biala by-election neih tura INC candidate PC Laltlan­sanga'n a tlawh nghal a, a ṭula hman turin Dinthar Veng VC leh YMA hnenah Rs. 25,000 a pe. MNF candidate Vanlalzawma, Thenzawla awm mek pawhin Serchhip MNF kaltlangin Dinthar Veng VC leh YMA hnenah Rs. 10,000 a pe bawk.

Dinthar Veng khaw­tlang chuan nimin khan chhawmdawl hna an thawk nghal a, Serchhip khawpuia veng danga mite pawh an thawk chhuak a ni.