Kawng chhâwng leh nuai 3 nawr turin PC Tlansanga kan din tir - Lal Thanhawla

Mizoram Pradesh Congress Committee (MPCC) chuan nimin khan Sechhipah April 17, 2021-a Serchhip biala MLA by-election lo awm tur atan campaign hawnna an buatsaih. MPCC president Lal Thanhawla chuan, kawng chhâwng leh cheng nuai thum sem nawr turin candidate atan PC Laltlansanga an dah thu a sawi.

Lal Thanhawla chuan, Aizawl khawpuia traffic jam tihziaawmna atana kawng chhâwng siam leh chhungkaw tin hnena cheng nuai thum sem an nghahhlelh thu a sawi a, "Term chanve an hmang dawn tawh a, kawng chhâwng atana hmalakna ka la hmu lo. Chuvangin, mi chak leh ṭha tak Pu PC Laltlansanga hi kawng chhâwng leh cheng nuai thum nawr turin kan rawn dah a ni. A tlin chuan a nawr chak ngei kan ring," a ti.

PC Laltlansanga an dintir chhan dang sawiin Lal Thanhawla chuan, "Serchhip bial hian MLA atan bial mi an la nei ngai lo a, nei ve ngei se kan duh. MZP hruaitu a lo nih tawhna leh ram leh hnam tana a lo thawh tawhnate thlirin, he bial hian an hlâwkpui ngei kan ring. Kan sorkar hi khalh ngil an ngai hlein a lang," a ti a; an candidate chu mi chak a nih avangin eptu atan a ṭangkai lehzual tur thu a sawi.

Congress party President chuan, Serchhip bialah term sarih chhung thlan tlin a nih tawh thu a sawi a; bialtu MLA a nih chhungin tihsual, tih dik tawk loh leh ṭawngkam mawi lote a lo hmang a nih chuan hriat rengsak lo turin bial mipui a ngen a ni.

INC candidate PC Laltlansanga pawhin thu sawiin, MNF-te'n thil chi hrang hrang an zawrh dawn thu a sawi a, "Kum 2018 inthlana an tiamte pawh pek a lawi an la nei lo. Chuvangin, a lut thar tur tan beisei tur a awm lo. An rawn tiam che u pawhin, an intiam lai video hmanga in lak bakah, ziakin intiamtir rawh u. Video chauh in neih chuan ziak an phût ang a, ziak chauh in neih chuan video an phût leh si mai ang," a ti.

PC Laltlansanga chuan, Assembly by-election awm tur chu ṭum dang nen a inan loh thu sawiin, "CM bial hniha an tlin avangin ṭum dangah chuan by-election a awm ṭhin a, sorkarna a inṭan dawn chauh ṭhin. Kan CM-in 'Khawvar hnua inthlang tur kan ni' a ti hi ṭum dangah chuan a dik chiah," a ti a; tun ṭumah erawh chuan MNF-in an term chanve dáwn hmang zoin, an thil ṭha tih sawi tur a awm loh thu a sawi.

ZPM candidate-in Congress mipuite chu tun ṭum inthlanah ZPM hlahthlem tura an sawm thu sawiin, PC Laltlansanga chuan, "Kum 2003 MLA by-election ṭumin Congress seat a lawm tiin a kian duh lo a, ZNP-in candidate an siam hnan. Miin ti tura kan duh ang bawk mi chungah tih tur. Kan hlahthlem dawn lo a, amah paih thlatute phuba kan laksak zawk dawn," a ti.

INC Candidate chuan, a candidate puite chu mi ṭha leh fel tak tak an nih thu sawiin, "Khawvel thilah phei chuan ka tluk lohte an ni ang. Mahse, he bial hmangaih leh bial tana hnathawh kawngah chuan ka cho," a ti a; thlan tlin a nih phawt chuan bial hmasawnna atan theihtawp tak meuh meuh a chhuah tur thu a sawi bawk.

MPCC campaign hawnna hi Serchhip district MPF president Rev. Zohmunmawia kaihhruaina hnuaiah hman a ni.