Sorkar website enkawl ṭha ber IPR

Information & Commu-nication Technology (ICT) department chuan nimin khan SAD conference hall-ah 'Government Website Excellence Award, 2020' an sem a, ICT minister Robert Romawia Royte-in a hmanpui. Website enkawl ṭha berah Information & Public Relations department thlan a ni.

Robert Romawia Royte chuan, "Nasa lehzuala sorkar department-te'n mipui tana service an pek chhuahte pho chhuak a, mipuite'n ṭangkai taka sorkar website an hman theihna tura website-te enkawl a nih nan award hi siam a ni. Award dawngtute hian an website tihchangtlun nan hmang se, mi dangte cho chhuah nana hmanrua ṭangkai a nih ka beisei," a ti.

Award semnaa tarlan danin, ICT department hian tun dinhmunah sorkar, institution, society-te website 336 a host mek a, website atana mamawh - domain, hosting leh CMS-te a thlawnin a pe mek.

Sorkar department-te'n anmahni website ṭha taka an enkawl theih nan training an kalpui mek a, kum 2016-2018 chhungin sorkar department website-te quarterly assessment leh evaluation nei ṭhinin, secretary meeting-ah an thehlut ṭhin.

Award ṭha thlannaah hian sorkar department website 45 endik a ni a, ICT department website erawh chu a buatsaihtu department an nih avangin telh a ni lo. Award dawngtur thlanna atan Technical Evaluation Committee leh Selection Committee din a ni.

Government Website Excellence Award, 2020 pakhatna IPR department-in Rs. 2,00,000 an dawng a; pahnihna Department of Personnel & Adminis­trative Reforms (DPAR)-in Rs. 1,00,000 leh pathumna Health & Family Welfare department-in Rs. 50,000 an dawng a ni.