Anemia Mukt Bharat Strategy hawng

Health & Family Welfare (HFW) minister Dr R Lalthangliana chuan nimin khan Taxation department auditorium-ah thisen tlâkchhamna (Anemia) laka beihpui thlakna tur, 'Anemia Mukt Bharat Strategy for Mizoram State' a hawng.

Health Minister chuan, mihring dam rei nan taksa hrisel a pawimawh tih sawiin, 'Natna hrang hrang enkawlna tur damdawi chi hrang hrang a awm rualin, damdawi mamawh lo turin mi tinin senso hautak loa kan tih ve theih a awm. Mahni taksa vawng uluk a, tui kan tih zawng ringawt ûm loa ei leh in hrisel leh ṭha kan thlan thiam a pawimawh," a ti.

Mizo zingah thisen tlachham, Hemoglobin (Hb) hniam an tam thu sawiin Dr R Lalthangliana chuan, "Thisen pek nikhuaah pawh pek tum, Hb hniam avanga pe thei lo kan tam ṭhin a, a bik takin hmeichhiate zingah an tam lehzual. Hei hi a chhan chu eng pawh ni se la, kan ei leh in bakah kan nunphung a hrisel zawnga kan her rem lehzual a ṭul niin a lang," a ti a; uar lehzuala zirtirna inpek a ngaih thu a sawi.

National Health Mission (NHM) mission director Dr Eric Zomawia pawhin thu sawiin, "Anemia Mukt Bharat hi sorkar laipui chuan September 2018 khan a kalpui tawh a, Mizoramah chuan hemi atana damdawi sem tur Iron-Folic Acid kan mamawh ang zat kan hmuh theih lawk loh avang leh Covid-19 hripui a rawn lên avangin kan kalpui tlai deuh hret a ni," a ti a; Hb hniam chu ngaihzam chi a nih loh thu a sawi.

Anemia Mukt Bharat hi NITI Aayog-in POSHAN Abhiyaan leh National Nutrition Strategy an duan zúlzuia kalpui a ni a; a tum ber chu - kum 2022 ral hmaa tleirawl (kum 15-19 inkar), hmeichhia nau pâi thei (kum 15-49), nau pâi leh nu nau hnute pe mek zinga Anemia vei kum tin 3%-a tihhniam a ni.