Lalhriatrenga'n nomination a thehlut

Serchhip biala Assembly by-election neih tura BJP candidate Lalhriatrenga Chhangte chuan nimin khan returning officer (RO), district bawrhsap ni bawk hnenah nomination paper a thehlut.

Lalhriatrenga Chhangte-in nomination paper a thehluhnaah hian BJP, Mizoram Pradesh president Vanlalhmuaka leh state hruaitu dangte'n an ṭawiawm a ni.

Vanlalhmuaka chuan, Serchhip bial by-election neih turah BJP candidate Lalhriatrenga Chhangte a tlin ngei theih nan theihtawp an chhuah dawn tih a sawi a, "Serchhip bialah hian hmasawnna thil thar kan hmuh theih nan BJP candidate hi kan vote tlin a ngai a ni," a ti.

Sorkar laipuiah BJP kaihhruaiin thuneihna an chang mek tih sawiin Vanlalhmuaka chuan, "Central tha chakna hmanga he bial mai bakah, Mizoram harsatna tam takah chhanchhuah kan nih theih nan BJP candidate kan thlan a pawimawh dawn. MNF sorkar, leh lama awr sen, leh lama awr dum ṭhin hian a hnathawkte hlawh pek tur ringawt pawh thapui thawha a ngaihtuah a ngai tawh a, hmabak êng an nei tawh lo," a ti a; BJP hi Mizoram mamawh chhanna tur niin a sawi.

Mizoram BJP President chuan, by-election neih turah hian sorkar laipuia minister-te pawh campaign tura an rawn kal dawn thu a sawi bawk.