ART Centre-ah mi 18,684 inziak lut tawh Health Minister-in ART centre 6 a hawng

Health & Family Welfare minister Dr R Lalthangliana chuan nimin khan Assembly Annex conference hall aṭangin HIV veite damdawi sem chhuahna tur, anti-retroviral therapy (ART) centre, district paruk - Siaha, Lawngtlai, Serchhip, Hnahthial, Khawzawl leh Saituala mite a hawng. February 2021 thlengin ART centre-ah HIV vei mi 18,684 an inziah luh tawh thu tarlan a ni.

Health secretary R Lalramnghaka sawi danin, National AIDS Control Organisation (NACO) remtihnain kum 2005-ah Mizorama ART centre hmasa ber chu Civil Hospital, Aizawlah hawn a ni a; a hnuah Lunglei, Champhai, Kolasib, Mamit leh Kulikawn damdawi-inahte ART centre hawn leh a ni.

India ramah HIV vei mi nuai 20 vel awm anga chhinchhiah a ni a, Mizoramah mi 20,000 chuang hret hmuh chhuah a ni tawh.

MSACS project director Dr Lalthlengliani tarlan danin, February 2021 thlengin Mizoramah HIV vei mi 18,684 chu ART centre-ah an inziak lut tawh a, mi 11,171-in ART damdawi an la mek. ART centre-ah hian thisen endikna ICTC-a HIV vei finfiahte chauh inziah luh theih a ni.

Health Minister chuan, Mizorama district zawng zawngah ART centre dah a ni tawh tih sawiin, "HIV positive-te’n district dang pan ngai loa awlsam zawka an awmna district-ah ART damdawi an lak theihna tur a nih avangin thil lawmawm tak a ni a, Mizorama HIV darh zel tur vènna lama hmalakna chhinchhiah tlak leh méllung pawimawh a ni," a ti a; ART damdawi lak ṭan dawna damdawi-ina test tihna man chawi ngai ṭhin chu tihtawp a ni dawn tih a sawi.

Covid-19 hripui donaa sorkar, khawtlang leh kohhrante an ṭan rual angin HIV/AIDS donaah pawh ṭanrualna ṭha neih a pawimawh thu sawiin Dr R Lalthangliana chuan, "Thawhhona ṭha tak kan neih chuan Mizorama HIV pung mek hi a tlakhniam theih ka beisei," a ti.