LAD Minister-in VC In a hawng

Local Administration department (LAD) minister K Lalrinliana chuan nimin khan a bial chhung, Kolasib Electric Vengah Panchayat Bhawan (VC In) a hawng.

LAD Minister chuan, Mizoramah Panchayati Raj inkaihhruaina zawm famkim ni chiah lo mah se, VC ruangám kalpui danah PRI kalphung tam tak zawm ve ṭan a ni tih sawiin, "VC term pawh kum 5 a ni tawh a, seat awm zat ang zelin hmeichhiate tan seat zuah ṭhin a ni," a ti a; VC chu mipui rorelna tichiangtu leh tichaktu a nih thu leh VC In chu mipui tana rorelna langtlang siamna hmun tur a nih thu a sawi.

Intodelh a pawimawh thu sawiin K Lalrinliana chuan, "Kan unau Zo hnahthlakte ṭanpui tur pawhin kan intodelh hmasak a ngai. Hripui léng avanga ramri khâr a ngaih cháng pawha buaina awm lo turin mi tinin kan phâk tâwk ṭheuhah intodelh kan mamawh," a ti.

LAD joint director Lalchawimawia tarlan danin, Rastriya Gram Swaraj Abhiyan (RGSA) hmangin kum 2019-20 chhung khan Panchayat Bhawan panga sak zawh a ni a, a dang sak chhunzawmna turin hmalak mek a ni.

Kolasib Electric Venga VC In, RGSA scheme hmanga sakna atan Rs. 20,00,000 sèn a ni.