Delhi aṭangin tangkhang an lo haw
May 29, Zirtawpni zan zanlai dar 12:30 khan Delhi aṭanga Mizo tangkhang rawn haw mi 1,463-te chuan Bairabi rél chawlhhmun an thleng a, rél chawlhhmunah enfiaha thil ṭul dangte tihfel a nih hnuah an district ṭheuha quarantine centre-a awm tura hruai an ni.
Delhi leh a chhehvela Mizo tangkhang rawn hawte chu Kolasib DC Dr H Lalthlangliana hoin sorkar official-te'n an lo dawngsawng a, Bairabi rél chawlhhmuna screening point 10-ah an dinhmun endik a ni. Quarantine centre an pannaah hian liaison officer hoin sorkar official eng emaw zatin an zui a ni.
Hetihlai hian Champhai district mi leh sa mi 15 phurtu bus chuan Mualkhangah ko pang a su a, hliam na tak tuar an awm lo. Bus khalhtu hi Kawnpui Police-te'n la nghalin, zu a rui tih finfiah a ni a, Kolasib SP thupekin thubuai ziahluh a ni.
Dt 31.05.2020 zing dar 9:45 khan Delhi aṭanga Mizo tangkhang lo haw te Bairabi aṭanga Champhai kal tur, passenger 15 phur Bus MZ 01E 8343 chu Mualkhang bulah a chesual. He Bus hian ko pang suin Passenger te hliam na tak an awm lo hlauh a ni. He Bus khalhtu, F.Lalnunzama(51) S/o F.Lalramzauva,Tuidam tuna Zemabawk a awm mek chu Kawnpu i Police ten la nghalin zu a rui ngei tih finfiah a ni a. SP Kolasib thupek angin case register nghal a ni a, Driving License pawh cancel tura hmalak nghal a ni. Kolasib Police te chuan tangkhangte hruaitu Bus driver te motor an khalh laiin ruih theih thila fihlim turin an chah a ni.