National SC/ST Hub Scheme zirho

Mizoram Handloom & Handicrafts Development Corporation (ZOHANDCO) chuan nimin khan Aijal Club-ah ‘Special Vendors Development Programme (VDP) under National SC/ST Hub Scheme’ an buatsaih a, Home minister Lalchamliana’n a hmanpui.

Lalchamliana chuan, hnam hnufual, schedule tribe leh schedule caste-te hmasawnna turin VDP duan a nih thu sawiin, "Intodelh kawngah hmasawn turin kut themthiamna hmanga thil deh chhuah tihpun leh thawn chhuah kawngah nasa zawka ṭan lâk a ṭul," a ti a; Mizo kutchhuakte chu hnam dangin an ngaihhlut avangin ram zau zawka thawn theih turin deh chhuah tihpun a ṭul thu a sawi.

Mizo hmeichhiate'n hma an sawn nasa tih sawiin Minister chuan, "Ram hmasawnna leh hma lam hun dinhmun chu mipui ngaihhlut zawngah a innghat thui hle. Kawng dik zawha ramin hma a sawn theih nan rinawmna leh thawhrimna a pawimawh," a ti.

National SC/ST Hub Scheme hi sorkar laipuia Ministry of Micro, Small & Medium Enterprise hnuaia duan a ni a; nimina zirhonaah hian Tourism, AH&Vety, Food Corporation of India leh Agriculture department-a mithiamte'n trade hrang hrang hnuaia vendor thlan chhuahte thil pawimawh an zirtir a ni.