Kristiante thlavang hauha vote pe turin Mintin kan ngen a che u - ZPM Chairman

Zoram People's Movement (ZPM) chairman Lalliansawta chuan India rama Kristiante an thlabar takzet tih hria a, an thlavang hauh zawnga vote pe turin Zoram mipuite a ngen.

Lalliansawta hian Inrinni khan Aizawl Press Club-ah thuthar thehdarhtute kawmin, "NDA sorkarah kum 2018 chhung khan hmun 34-ah Kristiante kut thlakin biak-in an suasam a, kumin thla thum lek chhung pawh hian vawi tam tak Kristianten kut an tuar leh tawh. Kristiante leh missionary-te an thlaphang takzet a, NDA paih tura vote kan pek hian Kristiante kan thlamuan a, NDA lam (BJP leh MNF)-te kan vote hian Kristiante kan tithlabar zual a ni," a ti.

ZPM Chairman chuan inthlan lo awm tur chu MP thlanna ni satliah loin, sakhaw indona a nih thu sawiin, "Kan sakhaw humhalh zawngin vote i pe ṭheuh ang u," tiin Zoram pui zawng zawngte Kristianna thlavang hauh zawnga vote thlak turin a sawm.

Kum 1925 ah Dr. Keshav Baliram Hedgewar an pawl a din a, chu pawl hming chu RSS hi a nih thu sawiin Lalliansawta chuan, "RSS thlazar hnuaiah Hindu pawl dang Hindu Mahasabha te, Jana Sangh te VHP te, Basrang Dal te, Shiv Sena te leh Brahma Kumarite a piang zel a ni. Heng zawng zawng hi Hindu lal ram din tum tute an ni. Jana Sangh chuan kum 1980 khan BJP tih hming a pu ta a ni," a ti.

Lalliansawta chuan kawng hrang hrangin Kristiante chungah kumtinin tuarna a pung zel tih sawiin, "In sawisak, invau, bung­raw tihchhiat bakah thihna te, pawngsual te a hluar hle," a ti a, Mizoramah kher kher chuan BJP leh a kaihhnawih reng reng sawimawi loh nise a duhthu a sawi.

BJP-te'n Mizoramah kawng hrang hrangin ṭan an la mek tih sawiin ZPM Chairman chuan, "Tunah rih chuan hma an sawm mawh hlein a hriat a, a lawmawm tak meuh a ni. Chutih laiin an hming pu chiah si lo, nihna leh sum leh pai thlakhlelh vang ringawta an lam ṭanga siam theih an nei zel a nih chuan ava pawi dawn em," a ti.

ZPM chairman chuan Congress nen an thawhho chhan sawiin, "Keimahni leh kan thlah lo awm zel turte tan, tuna party a kan tihphung leh nghet taka kan vawn tlatte pawh mahni hmasial taka chelh tlat loin kan ṭan tlan a ngai a nih hi tiin ke kan pen a, kan lo thawkho ta a ni," a ti a, Zoram mipui zawng zawngte BJP leh a thawhpuite ni lo lamah vote thlak ṭheuh turin a sawm.