Inthlanna thianghlim leh felfai atan kan inpeih tawh - CEO
Chief electoral officer (CEO) Ashish Kundra chuan April 11-a Lok Sabha MP inthlan lo awm tur atan inthlanna thianghlim leh felfai buatsaih tura an inpeih tawh thu a sawi.
Ashish Kundra hian Inrinni khan Information & Communication Technology (ICT) dept. conference hall-ah thuthar thehdarhtute a kawm a, Chawngte, Siaha, Lawngtlai, Kolasib leh Champhaite a tlawh thu sawiin, "Inthlan lo awm tur atana inbuatsaihnaah kan lawm hle. Polling official-te pawh uluk taka training pek an ni," a ti.
CEO sawi danin Lok Sabha MP inthlanah hian hmeichhe hlang duty-na polling station 117 siam a ni dawn a, polling station 101 ah chuan web casting kalpui a ni ang.
Mipuite'n vote thlak an ngaih pawimawhna atan voters forum 256 buatsaih a nih thu sawiin CEO chuan, "Heng bakah hian Young Voters Club-te din a ni a, motivation video-te pawh siamin, mipuite'n vote thlak an ngaih pawimawhna lam hawi short clip insiamsiakte kan buatsaih a ni," a ti.
Ashish Kundra chuan EVM leh VVPAT-te pawh hman tlak tura buatsaih a nih thu sawiin, "Polling party-te pawh ṭum hnih training buatsaih sak an ni tawh a, a ṭum thumna buatsaih leh a ni ang," a ti a, hmun hla deuha duty turte April 9-ah an duty na hmun tur panin, a bak zawng chuan April 10-ah an chhuah tur thu a sawi.
CEO chuan hmun tam takah mobile phone signal a awm loh thu sawiin, "Lawngtlai district-ah phei chuan polling station awmna zinga 50% chu mobile phone signal awm lohna a ni a, hengahte hian inbiak pawhna kawnga harsatna a awm lohna atan ruahmanna siam a ni. Venhimna lam pawh uluk taka kalpui a ni a, central armed police force company 12 chahluh an ni," a ti.
Mizoram People Forum (MPF) te puihna an ngen leh thu sawiin CEO chuan, "MLA inthlan neih zawh takah pawh MPF-te puihna avangin tluang takin thil kalpui theih a ni. Tun ṭum inthlanah pawh hian min pui leh ngei se kan duh hle. A bik takin polling station bula an lo duty-te kha a ṭangkai takzet a ni," a ti a, MPF hruaitute kawm a la tum thu a sawi.