Ruatkima'n an MNF candidate vote turin mipui a sáwm

MNF general sec­retary Lalruatkima chuan, MNF sorkar thar piang chu mipui ṭawngṭai chhànna a nih thu sawiin, Lok Sabha inthlan leh Aizawl West-I MLA bye-election-ah MNF candidate vote ṭheuh turin mipui a sáwm.

Lalruatkima hian Inrinni khan Aizawl Press Club-ah thuthar thehdarhtute a kâwm a; MLA inthlan zawh takah sorkar ṭha duhin kohhran mipui nasa takin an ṭawngṭai a, tlawm­ngai pawlte pawhin theihtawpa an chhuah thu sawiin, "Chumi chhanna chu MNF sorkar hi a ni. Pathianin sorkar thar min pe ta a, chu sorkar thar chuan chak leh ṭha takin ro an rel mek a ni," a ti.

Lok Sabha leh MLA bye-election-a MNF candi­date C Lalrosanga leh Zo­thantluanga te chu Zoram mipuite'n an vote chak a rin thu sawiin Ruatkima chuan, "Hmanni maia he ram rorel tlaka min ngaia min vote tlingtute chungah lawmthu kan sawi a, tun ṭumah pawh hian mipuite khawngaih taka MNF official candidate-te lo vote ṭheuh turin kan ngen tak meuh a che u," a ti a; rilru thiang tak leh thinling fing taka vote thlak a pawimawh thu a sawi.

Lalruatkima chuan, ni 100 an sorkar chhungin thil tam tak an ti tawh nia sawiin, "Pathianin Mizote hnama min din ang ngeiin Mizo nationalism lungphûm vawnghim turin chak zawkin hmalak a ni dawn. Pathian min pek kan ram, kan hnam leh kan sakhua a him theihna turin ‘Pathian leh kan ram tan’ ti chung zelin MNF chuan ke a pên zel a ni," a ti.

MNF Gen. Secy chuan, sorkarin Citizenship Amendment Bill (CAB) nasa taka a do thu sawiin, "Zoram mipuite'n kan duh lo a, nasa takin kan dodal a, CM ngei pawhin Prime Minister, Home Minister pisa leh NE CM Meeting-ahte nasa takin kan duh loh thu a thlen tawh," a ti a; CAB donaa a chet ṭhat êm avangin Mizoram CM hnenah NESO-in an thuchhuahah lawmthu an sawi tih a sawi.