KHAWTHLIR
Thisen pe
Inrinni khan Champhai Zotlang Branch KṬP-te'n an diamond jubille lawm nan Chamnphai Disterict Hospital tan thisen unit 49 an pe a, petute mipa 37 hmeichhia 12 an ni. Lairam Isua Krista Baptist Kohhran (LIKBK) Ṭhalai Pawl, Lawngtlai College Veng Bialte'n Lawngtlai District Hospital tan thisen unit 40 an pe a, a petute mipa 28 leh hmeichhia 12 an ni. Jubili Branch KṬP-in an kohhran hall-a blood donation camp an huaihawtah an member mipa 20 leh hmeichhia pahnihte'n Synod Hospital tan thisen unit 22 an pe bawk.
Kawlphethain man
Lalrosunga c/o Dr F Lianchhinga (L), Serkawn, Lunglei chu April 6, Inrinni chawhma lam khan Lunglei Ramthar Venga electric line a enfiahnaah kawlphethain a man a, a hmunah a thi. Thu dawn danin, Lalrosunga hi line endik tura electric bana a lâwn lai hian power supply an off nia sawi a ni a, line a khawih laiin current kal palhin a man a ni.
SPEAM khawmpui
Special Educator Association of Mizoram (SPEAM) chuan tun hnai khan SSA District Project Office conference hall-ah inkhawmpui an hmang. SPEAM hi rualbanlote zirtirna (special education) lama thiamna nei, Rehabilitation Council of India-a inziak lut, Mizoram hmun hrang hranga rualbanlote tana hna thawk mekte'n zirna leh kawng hrang hranga rualbanlote'n nasa lehzuala hma an sawn zel theih nan te, an dikna chanvo humhalhpui turtea din a ni.
Luiah mi pahnih tla hlum
April 6, Inrinni chhun dar 12 vel khan Nangsawmliana, Melbûk, Champhai district chu Mizoram leh Myanmar inrìna Ṭiau luiah a tla hlum a, a tlak hnu deuhah a ruang lak chhuah a ni. Thu dawn danin, Nangsawmliana hi Melbûk Branch KṬP-in Zokhawthar dái Ṭiau luia blanket an sûknaah a tel ve a, chesual palhin li-ah a tla hlum a ni. Inrinni vêk chhun dar 12:30 vel khan Lalrempuia (36) Vanbawng khua, Armed Venga khawsa mek chu Sairang bula Tlawng luiah chesualin a tla hlum. Thu dawn danin, Lalrempuia hi a fapa kum 10 mi vel nen Sairanga a naute an tlawh a, Inrinni khan Tlawng luiah chêngkawl an man a, a fapa chesual a chhanna lamah Lalrempuia chu tuiah a tla hlum ta nia hriat a ni.