Kum 2013-2017 chhungin Kristiante laka Tharum thawhna vawi 3,743 a thleng Synod-in fimkhur turin kohhran mite a ngen

Synod Inkhawmpui 2017-a rorel, India rama Kristiante tihduhdah leh nêkchêpna hluar zelah hmalak rêl a nih angin, Mizoram Presbyterian Kohhran chuan tunlai hian an kohhran mite hriat tur thuziak an thehdarh mek. Kum 2013-2017 chhungin India ramah Kristiante laka tharum thawhna ṭum 3,743 a thleng a, mi 522 an thih phah thu leh BJP chu Hindu lal ram siam tumtu an nih avangin an lakah fimkhur a ngaih thu an tarlang.

Mizoram Synod-in 'India rama Kristiante rtihduhdahna leh nekchepna hluar zel chungchang' tih lehkhabu thehhlep (booklet) a tihchhuah chuan, BJP chu India ram Hindu lal rama siam tumtu Rashtriya Swayamsevak Sangh (RSS) political wing a nih thu leh BJP sorkar hnuah India ramah Kristiante tihduhdahnaa hluar thu a tarlang a; BJP lakah fimkhur turin mipui an chah a ni.

hian India rama Kristiante tihduhdahna a hluar dan, tihduhdahna thlen dan, sakhaw chhinchhiahna suasam dan, India rama Hindu-te hmalak dan, Hindutva movement leh an tum te, zirna lama an inrawlh dante leh tribal-te zinga luh an tum dan, politics hanga an beih dan, ram dang aṭanga kohhranin puihna a dawn ṭhin an danchah dan, Hindutva-in Kristianna a nghawng dan, Mizo zinga an thawh dante leh Mizo Kristiante lo inven dan turte ziah a ni.

February 6, 2018-a Lok Sabha session-a zawhna (unstarred question no. 590) chhannaa a lan danin, kum 2013 aṭanga 2017 thleng khan India ramah Kristiante laka tharum thawhna ṭum 3,743 a thleng a, chu'ngah chuan mi 522 an thih bakah, mi 11,159 an hliam. Kristiante laka tharum thawhna a thlenin, Court lama zualkoin awmzia a nei ngai meuh lo niin an tarlang.

Booklet-ah chuan, sorkar laipuia BJP-in thuneihna an chan hnuah Kristiante ni pawimawh December 25 chu Good Governance Day-ah puan a nih thu sawiin, Kristian tam takin Krismas an lawm ṭhat theih loh phah tih a tarlang a, "Hei hian Kristiante thinlung a hliam nasa hle a ni," a ti.

Booklet-in a tarlan danin, kum 1925-ah RSS a ding a, a hnuah Hindu pawl dang Jana Sangh (kum 1980-ah BJP tih a ni), Vishwa Hindu Parishad (VHP) leh pawl dangte an ding zel a; chu'ng Hindu la run pawl hrang hrang chu Sangh Parivar tih an ni. Sangh Parivar-te chuan Hindutva movement an kalpui a, India ram chu Hindu lal ram atan din an tum a, kawng hrang hrangin hma an la a ni.

Booklet chuan, Bharatya Janata Party (BJP) chu RSS political front a ni tih sawiin, en dan thiam a pawimawh thu a sawi a, "Kum 2018-a India hmarchhak state assembly inthlanah sum an chelek nasat thu sawi a awm a, tuna MP inthlan awm leh turah pawh he hmanrua tho hi hman an tum leh mai thei," an ti a; state ṭhenkhatah chuan kohhran rawngbawltute tlawn nan ram thianghlim zin man tumsak thlengin an inzuar tih an tarlang.

Hindutva agenda dangte zingah - Uniform Civil Code te, zirnaa Hindu thil telh, history leh culture tihdanglam bakah, university thuneitua RSS mi dah te, sakhaw tenau zawkte humhalhna dan ṭhiah te, ram dang aṭanga kohhranin ṭanpuina a dawn ṭhin dansak te, Yoga tihlar te, kohhran leh mimal damdawi-ina inrawlhte a tel.

Tribal-te chu Hindu-a an inleh theihna turin Kristian aṭanga an chhuah phawt ngaiin an hria a, tribal-te chu Kristian an nih hmaa an sakhaw vawntir leh tumin hma an la tih sawiin Booklet chuan, "Mizo zingah chuan Zo Sakhua tiin hma an la. Kum 2005-ah Mizo Janajati Vikas Samiti an din a, Mizo naupang eng emaw zat India ram hmun hrang hrangah lehkha zir turin an thawn a. Chuta kal hmasa rawn kir leh tawhte'n 'Zo Sakhua' an din ta nia sawi a ni. Zo sakhua hi Hindu lal ram dinna tura hmanrua a ni," a ti.

Hindu pawlte hmalakna beih letna tur Booklet-in a tarlan zingah, 'Politics thila bum kan nih loh nan engkim langtlang taka kalpui tura beih a ngai,' tih a awm a; Mizo Kristiante ṭhatna tur a nih chuan kohhran pawhin huaisen taka a do ngam a ṭul thu pawh tarlan a ni.

Kohhran mipui hnenah ngenna siamin, "Hindutva movement hian India ram pum a tuam avangin kan ram pawh a nghawng mek a, sum leh pai leh therhlo uma an hmalakna ṭawiawm lo tur leh chutiang laka fihlim zel turin kohhran mite kan ngen a ni," an ti.