Covid 19 vangin Siaha dist.-a Myanmar nena inkalpawhnate Mizoram sorkarin a khar

Khawvel hmun hrang hranga natna hri Coronavirus (Covid 19) leng mek avangin Mizoram sorkar chuan Siaha district aṭanga ramdang nena inkalpawh theihna hmunte a khar.

Siaha addl. DC Malsawm­tluanga chuan March 7, 2020 khan thupek a chhuah a, Covid 19 kai India ramah hmuh chhuah a nih thu tarlangin, "A kai hmuhchhuah pawh a pung zel a ni. He hri India rama a darh nachhan ber chu ram dang tlawha zinte leh ram dang aṭanga India rawn tlawhtute (tourist) vang a ni tih hriat a ni," a ti.

Siaha district-ah Lodaw, Chapi, Lopu, Khaikhy, Zyhno, Lomasu, Iana, Siasi, Laki leh Khopa-te chu ramri kana Myan­mar intlawhpawh ṭhinna a nih thu tarlangin Malsawmtluanga chuan, "Amaherawhchu insum­dawntawnna hmun atana ruat an ni lo,"  a ti a, ramri kan khapna thupekin heng khuaa mipuite eizawnna kawngah nghawng ṭha lo a neih tur hriat a nih loh thu a tarlang.

Siaha Addl. DC chuan an district-a Myanmar nena inkal­pawhnate chu khar a nih thu sawiin, "Tumah boundary kal­tlanga inkal pawh phal a ni lo. He thupek zawm lote chu danin thuneihna min pek angin an chungah hremna lek a ni ang. Hei bakah hian Koocha, Tipi Ferry leh Siahatla-ahte hian check post pathum siam nghal tur a ni," a ti.

Champhai DC Naveen SL pawhin thuchhuah siamin, an district chu ramri hnaiha awm an nih avangin, khawchhak lam nen awlsam taka inkalpawh thei an nih thu tarlangin, sumdawng leh khaw chhak lama zin ṭhinte zin tawh lo turin a hriattir.

Champhai DC chuan VC-te chu an huam chhunga ram­dangmi inhlawh mek emaw zin an awm em tih zawng chhuak turin a hriattir a, "An awm a nih chuan an address leh rawn kal chhan ziaka chhinchhiah tur a ni. List chu March 20, 2020 ral hmain DC office-ah thehluh tur a ni. Tun hnaia ramdang aṭanga rawn zin an awm chuan medical screening neih zel tur a ni. Tin, khualzinte hi kar hnih chhung pawn chhuak loa awm tir ngei ngei tur a ni," a ti.

Siaha Addl. DC thuchhuah dangte :

•    SDO (C)/BDO, Tipa chu a bikin khaw pariat - Lopu, Chapi, Khalhkhy, Zyhno, Lodaw, Lomasu, Laki leh Khopai-ahte hian a rang thei ang bera gram sabha lo koa, mipuite lo hrilh hre tur leh border katlang lui an awm lohna turin VC leh NGO-te nen hma la tura hriattir nghal a ni.

•    Siaha CMO chu Kaochao, Tipi Ferry leh Siahatla-ahte Siaha SP nen 

ṭangkawpa check post siam nghal tura hriattir a ni.

•    Siaha BDO chu Iana leh Siasi-a a rang thei ang bera Gram Sabha ko a, mipuite hrilh hre tur leh border katlang lui an awm lohna turin VC leh NGO-te nen hma la tura hriattir nghal a ni.

•    Siaha DIPRO chu mipuite hnena a zau theih ang bera khapna thupek hi puangzar tura hriattir a ni.

•    Myanmar nena inkalpawh theihna khaw 10-a VCP te chu a rang thei ang bera gram sabha lo koa, mipuite lo hrilh hre tur leh border kaltlang lui an awm lohna turin leh NGO-te nen hma la tura hriattir nghal a ni.