MNF-in Aizawlah street campaign an nei

MNF party chuan Inrinni khan Aizawla veng hrang hrangah street campaign an buatsaih a, an MP candidate C Lalrosanga bakah, MNF party-a hotu hrang hrangte'n thu an sawi.

C Lalrosanga chuan, Chanmari kâwn leh New Market-ah thu a sawi a; sorkar laipuiin thing­tlang mipui leh miretheite tana ruahmanna tam tak a siam chu Mizoram hmun kilkhawr ber pawh a thlen theihna tura hmalak a tum thu sawiin, "Ṭhalaite eizawnna mumal nei lo tam tak an awm a, an talent ṭha tak takte eizawnna atana hmang chhuak thei tura hai chhuahsak ka tum," a ti. Citizenshop Amendment Bill chu theih­tawpa do a tum thu a sawi bawk.

MNF vice president Dr R Lalthangliana'n Tennis Court, Khatla kâwn leh Govt. Complex-ahte thu a sawi a, "Congress leh ZPM-te candidate hi mipui candidate a ni lo. Mipui candidate ti zawng­a kan sawi dawn a nih chuan, thla thum mai kal taa Zoram mipuiin sorkar tura hneh taka an vote tlin MNF candidate hi mipui candidate a ni zawk ang. Parliament House-ah hian private MP han ṭhu se an ho ngawt ang," a ti.

Ṭawi bialtu MLA R Lalzirliana pawhin Bawngkawnah leh Dur­tlangah thu sawiin, "MP inthlan a hnai tial tial a, MNF candidate boruak a lian zel a, MNF sorkar hnathawh an hmuh avang te, Congress leh ZPM thawkho, ṭangrual thei si lo leh an thawhhona duh loh avanga an pawl bànsan mi tam takin MNF an rawn zawm mek a ni," a ti a; an khingpuite chu an zuih tial tial niin a sawi.

MNF general secre­tary Lalchandama Ralte-in Zemabawk leh ṭhuampuiah thu a sawi a, "Mizoram mipuite'n kan rawngbawl tura kan thlan chhuah leh thuneihna kan pek hlim hlawlte nen inkawprem tur thlan nachang kan hriat a ṭul," a ti a; MNF candidate vote turin mipui a sáwm.

ITI Veng leh Mission Veng bazara thu sawitu MNF adviser Robert Romawia Ralte chuan, Mizoram sorkar tharin an election manifesto a tihlawhtling chho mek nia sawiin, "Mipui beisei bakin sorkar hmalakna a chak a, a ṭhat avangin Congress, ZPM leh BJP hruaitu lian leh member tam takin MNF an zawm ruih ruih a ni," a ti.

Aizawl khawpui chhung hmun danga van­tlang inkhawmah Tuikum bialtu MLA Lalrinawma leh Champhai North bialtu MLA Dr ZR Thiam­sanga ten thu an sawi bawk.