District thar leh MP thlan inzawm lo Mipui hnena MNF ba rulhna a ni - Tetea Hmar

Lok Sabha MP inthlan lo awm tura independent candidate Lalnghinglova Hmar chuan district thar nei zawng zawngte a lawmpui thu sawiin, "Chutihrualin district thar neih leh Lok Sabha inthlan awm tur hi thil inzawm a ni lo," a ti.

Lalnghinglova Hmar hian Inrinni zing khan Hnathial Bazar-ah thu sawiin, "Hnahthial hian hun rei tak district thar in ngen a, nasa taka inbeih hnuah district puitling in lo ni dâwn ta a, ka lawmpui takzet a che u. Chutihlaiin MP inthlan lo awm turah 'District thar lawmthu sawina' tia invau-thlem hi chu thil inhmeh lo tak a ni. Sorkar thar siam turin in vote tling tawh a, MLA inthlana in vote tlinten lawmthu sawina atan district puitling an pe zawk dawn che u a, an ba an rul mek chauh a ni," a ti.

Inrinni zanlai dar 12-ah amah hmuaktu Saichal khaw mipui pungkhawm hmaah thu sawiin Lalnghinglova chuan "MLA inthlan dawnah 'Min vote tling ula district kan ti puitling ang' an ti a, in vote tling a, district puitling in neih tur hi chu in phu ang ngeia in chanvo, lawmthu sawina a ni tawh. Lawmthu sawina chhan let nana lawmthu sawina vote an dil lêt tur che u a ni tawh lo," a ti.

Tetea Hmar chuan India ram inthlang tur thlirin "India rama Kristiante'n BJP-NDA paih an duh a, vanduaithlak takin MNF hi NDA-ah an tel miau si a, MNF candidate kan vote chuan a tawpa BJP sorkar tir tumna tho a ni, chu chu keini lamin kan duh loh chu a ni," a ti a, NDA paih a, Modi hi PM tawh lo se an duh thu a sawi. BJP-NDA lam lo tling leh palh se kan duh loh rawn CAB bakah a aia hlauhawm thei Uniform Civil Code pawh an la kalpui mai a hlauhawm thu a sawiin Lalnghinglova chuan, "Hengte hi Kristian tán a him lo. December 25, Krismas ni taka Good Governance Day hmang lui duhtu, Good Friday ni taka Digital India Day min puan hnan duhtu chu Modi kaihhruai NDA an ni. Mizo Kristian zawng zawng ṭan rual hun a ni," a ti.

Lalnghinglova Hmar chuan MP atana thlan tlin a niha a ngaih pawimawh turte sawiin, “Kuthnathawktute tána rotling tur thil (asset) hnutchhiah ngei kan tum dawn. Ṭhalaite eizawnna ngaih pawimawh a ni dawn a, ram dangte nena insumdawn tawnna tura hmachhawp awmte chak taka bawhzui ka tum a ni,” a ti a, chhim lam mite tana Mizoram University Southern Campus tur nawr mek pawh theihna sang bera bawhzui a tum thu a sawi.

Lalnghinglova Hmar hi Ngopaah Pathianni a cham a, vawiinah Hnahlan, Khawzawl leh Saitual a tlawh leh ang.