MC kawtah PRISM an campaign

PRISM party ṭhalai chuan Inrinni khan Millennium Centre tualah Lok SAbha inthlan atan street campaign an buatsaih a; an candidate TBC Lalvenchhunga'n thu sawiin, Mizo ram leh hnam himna chu ṭhalaite kutah a awm thu a sawi.

TBC Lalvenchhunga chuan, Mizoram hruaitu hmasate'n theihtawp chhuah­in hma an la ṭhin tih sawiin, "Anni chu an liam tawh a, an sûlhnu ropui takte chhawm nung turin ṭhalaite kutah kan ram leh hnam damna leh himna hi a awm a ni," a ti a; MP inthlan turah uluk taka ngaihtuahna sênga vote thlak turin ṭhalaite a sáwm.

PRISM Candidate chuan, kum upa zawkte ngaihthah an ni ṭhin nia sawiin, a hriatthiam loh thu a sawi a, "PRISM chuan MLA election-a kan tih tur ziah zingah pawh upate hamṭhatna tur kan dah. Ṭhalaite'n kan nu leh pa, kan pi leh pu kan tana hah taka lo thawk tawhtute hi i zahthiam ang u," a ti. MP inthlan turah Mizoram chhunga dan loa awm Chakma leh Bru-te vote a mamawh loh thu leh Mizo mipui vote chu tlinna khawp a nih thu a sawi bawk.