Lengpui Airport enfiah

Sorkar laipuia Ministry of Civil Aviation joint secretary Dr Rubina Ali leh Airport Authority of India (AAI) hotute chu Lengpui Airport enfiah turin nimin khan Mizoramah an rawn kal a; Lengpui Airport an thlen hnuah airport operational area, runway leh air traffic control tower-te an enfiah nghal.

Sorkar thuchhuah tarlan danin, Lengpui Airport enfiahtute hi chief minister Zoramthanga leh Union Civil Aviation minister Hardeep Singh Puri te January 20, 2020-a an inkawmna bawhzuia thawk chhuak an ni a; AAI hotu lo kalte chu executive director (NER) Sanjeev Jindal leh general manager (Guwahati) JT Radha Krishnan te an ni.

Civil Aviation leh AAI hotute hi nimin tlai khan Secretariat Conference Hall-ah chief secretary Lalnunmawia Chuaungo, GAD secretary Ashish Kundra, GAD Aviation Wing Principal Consultant leh Lengpui Airport hotute nen an inkâwm leh bawk.