Haw tharte'n Champhai/Khawzawl thleng

Karnataka, Gujarat, Madhya Pradesh, Bihar leh Andra Pradesh-a Mizoram mi leh sa tangkhang rawn haw thleng tawh zinga Champhai leh Khawzawl district mite chuan May 30, Inrinni khan an awmna hmun tur quarantine centre an thleng a, sorkar official-te leh damdawi lam mite'n an lo hmuak.

Champhai district mi leh sa 133-te chu bus pakua hmangin Champhai an thleng a, Vanlallawma Indoor Stadium-ah SP Rex Zarzoliana, bawrhsap mawhphurhna latu Mark Lalthanliana leh hotu dangte'n an lo hmuak. Haw tharte chu medical screening team pahnih leh Rapid Antibody Test (RAT) team pathumte'n an enfiah a ni.

RAT hmanga endiknaah reactive (positive) mi 13 an awm a, Karnataka aṭanga haw mi 11, Gujarat aṭanga haw mi pahnih leh Madhya Pradesh aṭanga haw mi pakhat an ni a; an swab sample lak niin, ZMC-ah endik tura thawn a ni.

Champhaiah hian nimin khan Delhi aṭanga haw mi 114-te'n Champhai an thleng leh tura beisei a ni a, Tlangsam Polytechnic-ah khung hran an ni ang.

Khawzawl district mi leh sa haw thar mi 32, mipa pakua leh hmeichhia 23-te chu Khawzawl DC H Lianzela hoin medical team leh official dangte'n Field no. 1-ah an lo hmuak. Bawrhsap chuan, haw tharte chu hlim leh thlamuang taka awm tur leh, khawtlang himna tura ruahmannate zâwm turin a sáwm.

Khawzawl district mi haw tharte hi medical team-in an endik hnuah quarantine centre pathum - Horticulture staff lodge, Forest rest house leh JNV-ahte dah an ni.