BJP-in manifesto an tlangzarh Uniform Civil Code leh CAB a tel

Bharatiya Janata Party (BJP) chuan nimin khan Lok Sabha inthlanpui neih tura an party election manifesto an tlangzarh. BJP manifesto-ah hian The Citizenship Amendment Bill (CAB) kaltlangpui leh Uniform Civil Code (UCC) hman a tel.

BJP manifesto 'Sankalp Patra' tia vuah hi nimin khan New Delhi-ah prime minister Narendra Modi-a'n a tlangzarh a, tlangzarh inkhawm­ah hian BJP hruaitu liante an tel.

BJP Manifesto Committee chairman Rajnath Singh chuan, an manifesto chu vision document tia sawiin, "Prime minister Modi-a kaih­hruai sorkar chuan ram hma­sawnna a ngai pawimawh a, firfiaka chêtnate a ngaizam dawn lo. India ram hi kum 2047-ah chuan develop­ed nation-ah siam kan tum a ni," a ti.

BJP manifesto-a langsar zualte chu - Parliament session hnuhnung bera an pass theih loh CAB tharthawh leh te, Uniform Civil Code kalpui te, Ram Mandir sak te, India Constititution-a Article 35A ṭhiahte leh firfiak laka zero tolerance kalpuite a ni.

CAB hi Parliament session hnuhnung berah Lok Sabha-ah pass a ni a, Rajya Sabha-ah put luh tum ni mah se, dodalna a nasat avangin put luh a ni lo. Tarlan tawh ṭhin angin, CAB hi Mizorama tlawmngai pawl leh kohhrante chuan Mizoram tana him loa ngaiin an lo dodal tawh ṭhin a, an dodalnate pawh an lo lantir tawh ṭhin a ni.

Uniform Civil Code hnuaiah hian India ram mipui zawng zawngte chu an sakhua sawi loin, dan inang vek hmantir tum a ni. Constitution-a Article 44 chuan inneih, inṭhen, inenkawlna leh rokhawm chungchangahte India rama chengte chu dan inang vek an hmang tur tih a ni a; hetianga dan inang tlang hmantir tum hi sakhaw tlem zawkte nêkchêpna remchangah hman theih a ni dawn niin mithiamte chuan an sawi.

Mithiamte sawi danin, Uniform Civil Code hnuaiah chuan sakhua leh hnam hrang hrangte'n sakhua leh hnam bila dan leh hrai, kalphung leh nunphung hrang hrang an neihte an hmang thei dawn lo. Hei hi BJP-te'n India ram Hindu rama an siamna tur hmanraw pakhatah ngaih a ni.

India Constitution chuan mi tinte chu eng sakhua pawh zawm se zalenna thuhmun a pe a, mahse, UCC chu hman a nih a, sorkarin sakhaw tihbik a neih chuan sakhua leh hnam tlem zawkte tan a hlauhawm thei dawna ngaih a ni.

Article 35A chu Jammu & Kashmir-a chengte hung bikna dan a ni a, dan hnuaiah chuan perma­nent resident ni lote chuan ram leh in an neih theih lohna a ni. He dan ṭhiah hian J&K-a political party hrang hrangte'n an duh lo a, ṭhiah a nih chuan India ram aṭanga in dang an pawi tih lo thute an lo sawi tawh ṭhin. Mahse, BJP chuan Hindu-te J&K-a an pêm luh theihna a nih beisein Artcle 35A hi ṭhiah an duh niin mithiamte chuan an ngai.