MNF candidate-te vote turin mipui sâwm

MNF General Head­quarters-a adviser Robert Romawia Royte chuan, Lok Sabha in­thlanpuia an candidate C Lalrosanga leh Aizawl West-I Assembly bye-election-a an candidate Zothantluanga te an chang thei chu an vannei hle niin a sawi a; an candidate-te vote turin Mizo mipui a sáwm.

Robert Romawia Royte hian Mizoram state-a MNF kaihhruai sorkar hmalak tawhna hrang hrangte a sawi lang a, "Sorkarna kan chan tirh phat aṭangin MNF mani­festo tihhlawhtlin hna kan thawk ṭan nghal a ni," a ti.

Robert Romawia chuan, "MNF sorkar thar hi mipuite'n an thlan tlin chhan manifesto-te tihlawhtling turin a ding nghet a, hun tlemte chhungin eng emaw zat a tihlawhtling tawh a, ṭan a la chho zel dawn," a ti a; MNF manifesto-a inziak zawng zawng tihhlawhtlin a nih theih nan Central sorkara lo bawhzuitu atan C Lal­rosanga thlan tlin a pawi­mawh niin a sawi.

MNF sorkarin SEDP an tihlawhtling nghal dawn nia sawiin Robert Romawia chuan, "Kumin 2019-20 ah kan state budget bikah chauh pawh cheng vbc. 860 kan dah nghal a, he sum hi sum tam zawk hai luh nana state share-ah pawh hman theih tur a ni. Central aṭanga sum hmuh kan beisei nen chuan kum­inah chauh pawh vbc. 1500 chuang neih a beiseiawm," a ti.

MNF Adviser chuan, MNF party chu miin an zawm thar reng nia sawiin, "Tunlaia mipuiin ruling party an zawm nasat ang hi MP election awm tawh zawng zawngah a la thleng ngai lo a, VC leh LC MNF-a inlet thar pawh 100 chuang fe an ni ta," a ti a; MP election leh MLA bye-election-ah hnehna sang takin MNF candidate an tlin ngei an beisei thu a sawi.

Robert Romawia chuan, Citizenship Amend­ment Bill (CAB) dona kawngah MNF hruaitute chu hma la nasa ber an nia sawiin, chief minister Zoramthanga'n Delhi-ah Prime Minister leh Home Minister-te a sawipui thu a sawi a, "Party dangte an ṭang na ve lo. Sorkar hmasaa CM kha CAB duh lohna thu thlen turin Delhi a thleng miah lo a, NE state danga party dangte nena ṭanghoa CAB donaah ke a pên kan hre lo. ZPM hotute leh party dangte pawhin a dona hmun turah awmze neiin an do lo a ni," a ti.

Robert Romawia Royte chuan, India rama Lok Sabha inthlanpuiah BJP kaihhruai National Democratic Alliance (NDA) chu sorkar leh tura mi rin an niin a sawi a; Congress party leh an thawhhona United Progressive Alliance (UPA)-te chu an sorkar zo dawn lo niin a sawi a ni.

Press conference-ah hian MNF candidate-te - C Lalrosanga leh Zo­thantluanga te pawh an tel a; C Lalrosanga chuan, MP a nih chuan Mizoram tan do ngai apiang a do ang a, thlàwp ngai apiang a thláwp dawn tih sawiin, "Central-ah Mizoram tan theihtawp ka chhuah dawn a, Mizo mipui thlavang ka hauh dawn a ni," a ti.