Cheng nuai 3 kan sem dawn lo MNF-in an ti leh tawh - MPCC & ZPM

Mizoram Pradesh Congress Committee (MPCC) & Zoram Peoples' Movement (ZPM) Joint Publicity Committee chuan, MNF party president Zoramthanga'n inthlan campaign laiin sorkarna an chan chuan Rs. 3,00,000 an sem tur thu a sawi ṭhin tih an sawi a, "Tunah chuan sumin kan sem dawn lo an ti leh tawh a ni," an ti.

MPCC-ZPM Joint Publicity Committee (JPC)-te hian nimin khan Aizawl Press Club-ah thuthar thehdarhtute an kâwm a; an vice chairman Lalsangzuala Hmar chuan, inthlan campaign laiin MNF president Zoramthanga'n Rs. 3,00,000 an sem tur thu a sawi tih tarlangin, "A thusawi hi whatsapp-ah pawh a darh nasa hle, tunah chuan sumin kan sem dawn lo an ti leh tawh a ni," a ti a; Mizo mipuite awlsam taka bum theiha a ngai chu lungchhiatthlak an tih thu a sawi.

Lalsangzuala chuan, March 24, 2017-a SEDP tlangzarhnaah pawhin Zoramthanga'n chhungkaw khat hnena cheng nuai 3 an sem tur thu a sawi tih sawiin, "Sorkarna an chan theihna turin SEDP an zuar a, mipuite'n ṭha an ti a, Dr Thangtea project hi MNF hian an tlinpui a tih theih. Mahse, tunah chuan Chief Minister, Finance Minister ni bawk chuan Dr Thangtea hmingṭhat lutuk a hlau a ni ang, a sawipui duh tawh lo," a ti.

SEDP chu ṭan a nih hma aṭangin a buai nghal nia sawiin Sangzuala Hmar chuan, "An minister chhuanvawr pahnih Pu Lalruatkima leh Pu Robert Romawia Royte-te chuan an han vawrh thar leh a. Pu Robert Romawia'n SEDP atan budget-ah cheng nuai 45,000 an dah thu a sawi laiin, Pu Lalruatkima chuan cheng nuai 75,000 kan dah, a ti thung," a ti a; SEDP chu an duh dan danin MNF hotute'n an sawi kual mai mai tih a sawi.

Lalsangzuala Hmar chuan, MNF-in BJP an zawm loh thu MNF presi­dent Zoramthanga'n ṭawng­kam thiam taka sawi mâm a tum ṭhin chu mipui bum tumna a nih thu sawiin, "BJP-in a din NDA leh NEDA-ah MNF an tel a ni tichiang lehzualtu mi tam takin kan la hriat loh chu, BJP website-ah chiang taka tarlan a ni a, India rama BJP kaihhruai NDA sorkarna a lakna state zingah Mizoram telh a ni," a ti.

MNF telna NDA dintu BJP-te'n nimin khan an manifesto an puan thu sawiin Lalsangzuala chuan, "Kan hriat theih chinah sorkarna an siam chuan Article 25(A) ṭhiah an tum a, hei hi tihpuitlin a nih chuan Pakistan-a Hindu ho an duh duhin Jammu & Kashmir-ah an kal theih dawn a, chhawmdawlna pek an ni dawn. Hnam leh sakhaw tênaute tana hlauhawm em em Uniform Civil Code pawh kalpui an tum a ni," a ti a; BJP chuan an manifesto-ah CAB kaltlangpui pawh an la dah ngei tih a sawi.

Lalsangzuala Hmar chuan, Congress sorkar kal ta khan chhim lam district pathum a ngai pawimawh hle tih sawiin, "Chhim lam aṭanga MLA-te chu speaker, cabinet minister, parliamentary secretary leh commission chairman nihnate chelhtir an ni. MNF sorkarah chuan Dr R Lalthangliana, C Lalrinsanga leh Dr K Beichhua te chauhin nihna pawimawh an nei. CM Pu Zoramthanga'n Lai ADC ṭhiahah a la vau zui zawk a ni," a ti.