District thar 3-ah DC-te I-Day-ah Hnam puanzar pawh pharhtir tum

MNF president Zoramthanga, chief minister ni bawk chu nimin khan Lok Sabha inthlan atan campaign-in Saitual a tlawh a; vantlang inkhawmah thu sawiin, district thar - Saitual, Hnahthial leh Khawzawl district-te chu an DC ṭheuhin kum 2019 Independence Day-ah hnam puanzar an pawh pharh tur thu a sawi.

Zoramthanga hi mipuiin an lo zâwn a; Saitual Bazarah thu sawiin, "District thar pathumte function turin thukah bél chhuangin mei kan nun tawh a, a khawnpui Finance department aṭangin a ṭul angin an tuah belh zel dawn a, kumin Independence Day-ah an DC ngei flag pawh pharhtir kan tum a ni," a ti.

MNF President chuan, "District thar ramria rìn luh duh lo chu an duh duhnaah tel kan remti ang," a ti a; Aizawl district mipui nuai thum chuang awmnaa office dawr hautak lutuk kára awm reng ai chuan, thil tih zung zung awlsamna district tê zawka awm chu châk an la tam tulh tulh dawn niin a sawi.

Citizenship Amendment Bill (CAB) chungchangah Zorama chuan, Prime Minister hmai­chhanah leh Home Minister hnenah CAB an duh loh thu a sawi tih a sawi a, "Cabinet resolution-a CAB duh loh thu pass-tu chu MNF chauh kan ni. Congress leh ZPM te hi chu Thlanrawkpa Khuangchawia uṭawk leh choâk inhau ang lek an ni," a ti.

MNF president chuan, Mizoram lottery chungchang sawiin, Court-in chhunzawm tura min tih anga chhunzawm an nih thu a sawi a, "Distributor-te term ṭum hnih a zawh hnuah pawh rate ngaiin vawi hnih an hun pawhseisak an ni. A ṭum thumna atan pawhseisak leh an tum a, nasa takin kan nawr a, inthlan a lo hnai nen an tihtawp sak ta a. Distributor hian Court-ah sorkar min khing a, Model Code of Conduct puan a nih avangin tender thar a chhuah theih si lo a, Court chuan, tender thar tih­chhuah a nih theih hma lo kalpui leh rih turin min ti ta a ni," a ti. Lottery chungchangah hian ZPM chu Election Commission-ah an zualko niin a sawi.

Zoramthanga chuan, Saitual bial mipuite chu MP election-a MNF candidate vote vek turin a sáwm a ni.