Presbytery khawmpui thurel bawhzuiin Kohhran pali-in Chite Lui an thianfai

Aizawl Central Presbytery Inkhawmpui thurel bawhzuiin Inrinni khan Ramthar Veng Pastor Bial huam chhunga kohhran pali - Ramthar Veng Kohhran, Ramthar Tlangveng Kohhran, Ramthar North Kohhran leh Ramthar Vengthlang Kohhrante chu Chite Lui thianfaiin hnatlang an nei. Inrinni vek khan Chite Lui kama dan loa leivung paihna siamtute titawp turin thuneitute'n an hriattir.

Hnatlang hawn inkhawm Chite Lui kam Ramthar kaia neih chu Ramthar Veng Pastor Bial chairman Upa Dr. Lalnunsiama Colney-in a kaihruai a, Aizawl Central Presbytery moderator Upa Hmingthanga’n hnatlang hi ṭawngṭai in a hawng. Chite Lui Coordination Committee general secretary Rocham­liana leh treasurer Dr Vanlalthlana, Aizawl North-II bialtu MLA-te'n thu an sawi. Dr Vanlalthlana chuan kan ramah lui tam tak thi tawhin, a thih mek zel thu a sawi a, "Chite Lui erawh chu chhan chhuah theih anih laia chhan chhuak turin Mizo mipuiin ṭan kan la mek a ni. Chite Lui chhanchhuahna atana hmalakna zahawm takah hian tha kan thawh ve thu leh a tihfai hnatlangah pawh kan tel ve tih thu ṭhangthar lo la awm zel turte hnena sawi tur kan nei hi a vanneihthlak hle. Aizawl Central Presbytery-in hetianga hma a hruai hi fak tlak a ni," a ti.

Chite Lui chhanchhuah leh humhalhna atana hmalakna kal mek ṭawi­awm tura rawtna, Armed Veng Pastor Bial aṭanga lut chu Aizawl Central Presbytery-ah ngaihtuah anih hnuah, a bawhzui dan tur lo rel turin Presbytery Standing Committee ruat an ni. Presbytery Standing Committee chuan Save Chite Lui Coordination Committee be rawn chung zela ruahmanna a siam angin kawng hrang hrangin bawhzui chhoh mek a ni. 

Presbytery Stan­ding Committee-in rua­hmanna a siam ṭhen­khatte chu zirhona leh inrawnkhawmna hun buatsaih te, zing ṭawngṭai inkhawm thupuia neih ṭhinte, in tina lehkha sem te, naupang Sunday School inkhawma inzir­tirna hun bik buat­saihte leh mahni kohhran huamchhung ṭheuha hnatlang neih ṭhinte a ni.

Aizawl Central Pres­bytery huam­chhungah hian pastor bial panga - Dawrpui Bial, Electric Veng Bial, Armed Veng Bial, Ramthar Veng Bial leh Chhinga Veng Bialte an awm. Hetihlai hian Inrinni vek khan 'The Chite Lui (Prevention and Control of Water Pollution) Rules' lekkawh tura nodal officer mawhphurhna chelhtu Aizawl North SDPO Lalpianthanga chuan Ramthar kai leh a chhehvela Chite Lui kama phalna nei loa leivung paihna hmun siamtute hnenah an thiltih lai chu titawp nghal turin a hriattir a, leivung paih lirthei luh theihna tura kawng an sialte pawh Inrinni tlai ngeia ping nghal turin ram neitute hnenah a hriattir bawk.