PRISM candidate-in street campaign nei

Lok Sabha inthlan tura PRISM party candidate TBC Lalvenchhunga chuan nimin khan Champhaiah street campaign a nei a; Member of Parliament (MP) atan thlan tlin a nih chuan Mizoram mipuite MP pakhat thil tih theih hmuhtir a tum thu a sawi.

TBC Lalvenchhunga chuan, 'MP pakhat lekin engmah tak tak a ti thei lo,' tia sawi an awm ṭhin thu sawiin, "MP pakhat hian thil a ti thei khawp mai. A thil tih theihzia in hriat duh chuan min thlang tling rawh u, ka hmuhtir ang che u. Tling tura kan rin ni lo, tling tura kan duh ngeiah vote i thlak ngam tawh ang u," a ti.

PRISM candidate chuan, ram a vei ṭhin avangin a duhthlanna ngeiin politics a luhchilh tih sawiin, "MLA election-ah khan Champhai North-ah PRISM candidate niin ka ding a, ka vote hmuh zatte chu nuihza siam nana min hmang pawh an awm mek. Mahse, Mizoram hmangaih vangin zak loin ka rawn ding chhuak leh a ni," a ti a; amah chiah mahni awmna party chhung aṭanga candidate awm­chhun a nih thu a sawi.

PRISM president Van­lalruata pawhin thu sawiin, "MNF emaw BJP emaw candidate i vote chuan CAB leh Border Pass Scheme, khawchhak lama kan unaute nena kan inkara daidanna bang siam­na tur leh khaw­thlang lam aṭanga Bangladeshi-te'n min rawn chîmna tur i vote chhuak dawn tihna a ni. Congress leh ZPM thlawp independent candidate i vote chuan sakhaw tih bik nei lo i vote chhuak dawn tihna a ni," a ti a; PRISM candidate vote turin mipui a sáwm a ni.