Hriata Chhangte-in mipui vote a ngen
Lok Sabha inthlan tura independent candidate Lalhriatrenga Chhangte chuan nimin khan Aizawl Press Club-ah thuthar thehdarhtute a kâwm a; Mizo mipuite chu amah vote tura ngenin, "Ka chhinchhiahna 'Motor ke' ah min lo hmeh rîksak ve thei hram ula, kum nga hun full ṭhakin ka pe let dawn che u a ni," a ti.
Lalhriatrenga Chhangte chuan, Mizoram MP atan a tling a nih chuan, tihhlawhtlin tur personal manifesto point 12 a nei tih a sawi a; ṭhalaite tan hna siam a pawimawh thu sawiin, "Heti taka eizawnna lama kan tight em em chhan bul ber nia lang chu, kan state sorkar, a tuate pawhin infrastructural development lam buaipui lo a, vote zawnna atan sem policy an kalpui rei tawh vang a ni," a ti a, political party-te chu tlin hrim hrim tum an nih thu a sawi.
Sorkar laipui leh public sector undertaking (PSU)-a hna hrang hrangah tribal-te tan quota a awm thu sawiin, hman thiam a ṭul thu a sawi a; private national/multinational company-ah Mizo ṭthalaite an thawh theih nana hmalak chu MP nih a châk chhan a nih thu sawiin, "MP ka nih ngat chuan training/placement agency-te thawhpuiin a tam thei ang ber Mizoram páwnah kan ṭhalaite training pein, chhawr tlakah kan chantir dawn a ni," a ti.
Lalhriatrenga Chhangte chuan, Mizoram leh a chhehvela leihnuai hausakna hman ṭangkai te, Mizoram leh Assam ramri chinfel te, Chakma leh bru issue tihtawpte a ngaih pawimawh thu a sawi a; MP a nih chuan a MP LAD fund chu party mite hamṭhatna siamsak nan ni lo, mipui vantlang mamawh tak taka hman a nih theih nan indepdendent MP neih a ṭul thu a sawi bawk.