Mahni tan vote i thlak ang u - Vanlalthlana

Aizawl North-II bialtu MLA Dr Vanlalthlana chuan, Lok Sabha inthlanpui awm tur chu a pawimawh em avangin mipuite chu party leh candidate tana vote thlak an nih dawn loh thu a sawi a, mahni tan ṭheuha vote thlak turin a sáwm.

Tun hnaia Ngopa leh a chhehvel khaw hrang hrang an fannaa a thu sawinaah Vanlalthlana chuan, "Inthlanna ṭhenkhat­ah chuan party leh candidate tan vote kan thlak ṭhin. Tun ṭum chu mahni tana vote thlak tur kan ni. Kan ram, kan hnam leh sakhaw hma lam hun bûk a ni dawn a, keimahni tana ṭha tur thlang thiam ang u," a ti.

Dr Vanlalthlana chuan, MNF chu BJP nen an thawk dun chiang tih sawiin,"BJP-in NDA a din a, NDA-a awmte chu BJP thláwptu leh thawhpuitute vek an ni a, MNF hi BJP nen an inzawm nghet hle a ni," a ti a; BJP leh MNF inzawmna chu sawibo theih a nih loh thu a sawi.

Tunah hian BJP-in anmahni chaknain Mizoramah kua an hreuh thei lo a, MNF hmaikáwra vuah hawh mai an ni tih sawiin Vanlalthlana chuan, "Hindu firfiak pawl RSS-in BJP an din a, anni hian NDA an din leh a, chuta awmte chu an inzawm vek a ni. Lok Sabha inthlana MNF vote chu a tawpa Narendra Modi bawk tlintir tumna, BJP sorkartir leh tumna a ni," a ti.

Dr Vanlalthlana chuan, mipui candidate Lalnghinglova Hmar vote tura mipui sáwmin, "Mipui Candidate hi ka mi hriat chian, ka sikul kalpui a ni. Kum 2007-2008 velah khan tlaivar dawn dâwnin ram veiin kan bei tawh ṭhin. A kalna kawngah pawh ram tana mi ṭangkai a ni. Mi thiam a ni a, a taima a ni," a ti a; Lalnghinglova Hmar chu hnam dang zinga Mizoram aiawh turin a tling tawk tih a sawi.