Sumdawnnaa Aizawla task force-te hmalak dan

Covid-19 hripui léng vanga inkharkhip kaihhruaina Mizoram sorkarin a tihchhuah hmangin, Mizorama local task force tam tak chuan an veng chhung tan hna an thawk a, sumdawnna leh mipui mamawh chungchangah pawh kawng hrang hrangin hma an la a ni.

Mizoram sorkarin inkhàr­khip thawh linaa inkaihhruaina a kalpui a clause-D: 'Dawr leh sumdawnna hmun' tih hnuaia­ sub-clause (4)-ah, 'Mipui mimirin awlsam taka thlai leh chawhmeh an hmuh theih nan veng hrang hrangah LLTF/VLTF-te'n chawhmeh zawrhna tur an ruahman ang,' tih a awm.

Inkhàrkhip kaihhruaina ang­in Aizawla veng ṭhenkhat local task force-te chuan mipui tana awlsam turin chawhmeh zawrh­na hmun hrang hrangah an siam a veng ṭhenkhatah chuan task force phalna loin inzawrh phal a ni lo. Hetih lai hian, veng 

ṭhenkhatah chuan kaihhruaina bung D(7)-a, 'Tuallai leh kawtthlera thil zawrh (street vending) khap tlat a ni,' tih hmangin kawt­thler leh khawlaia thil zawrh an khap a, thil zawrhna hmun bik an siam a ni.

Vanglaini palaiin Aizawla veng hrang hrang task force-te an hmalak dan a zawh zingah Durtlang task force chuan, an venga kawngpui dunga inzawrh leh Zirtawpni leh Inrinnia khawlaia chawhmeh zawrh an khap a, mahni in kawtkaia lo 

ṭhutpuite erawh chu hriatthiam chin an nei a, bazara inpho an phal lo. Hall-ah chawhmeh zawrh theihna hmun an siam a, inphurh chhuaha zawrh an phal.

Chanmari task force chuan an hnen aṭanga phalna nei lo tan inzawrh an phal lo a, phalna neite tan veng chhung kawngpui hmun âwl lai leh bazarah inzawrh an phal. Inrinni bikah chuan MacDonald Hill panna kawngpui chhoa inpho an phal bawk.

Chaltlangah chuan bazar hmun an ṭhiah avangin task force-te'n Tourist Lodge panna kawngpui sira footpath-ah chawhmeh zawrhna an siam a, a duh apiang (khaw dang leh tualchhung mi) tan niléngin an hawng. Bawngkawnah chuan task force ruahmannain bazar chung hmun remchangah chawhmeh zuarte an ṭhu a, khawlaia ṭhutpui an phal lo.

Ramhlun North task force chuan an vengah a duh apiang­te tan phalna la kher loin thil zawrh an phal a, inkharkhip hmaa an venga inzawrhna bik nei sate pawh a ngai angin an ṭhu leh tawh. Chanmari West task force chuan veng chhungah kal kuala chawhmeh zawrh an khap a, khawlai hmun remchang laia ṭhutpui erawh an remti thung. Ramhlun South task force chuan an venga bazar chu zing dar 7 aṭanga tlai 5 inkarah an hawng ṭhin a ni.