MLA-in quarantine centre a tlawh

ZPM Legislature Party secretary Dr Vanlalthlana chuan May 30, Inrinni khan Mizoram sorkarin quarantine facility atana a hman R Dengṭhuama Hall a tlawh a, state dang aṭanga lo hawte dawnsawn dan leh state danga haw turte thawn chhuah dan a en.

Dr Vanlalthlana chuan, state páwn aṭanga Mizorama rawn haw buaipuitute zawng zawngte thawhrimna leh tlaivara an duty hialte chu fakawm a tih thu a sawi a; state hrang hranga a ruala lo hawte chu hun bichilh takah a sang têla an lo thlen ṭhin avang leh medical screening tih chhung a rei avangin an kal lehna tura sem darh hna thawktute leh screening titute an indaih lo ṭhin hle tih a hmuh thu sawiin, him zawk leh chak zawka hna thawh a nih theih nan sorkarin thawktu dah belh thei se a duh thu a sawi a ni.

ZPM MLA hian May 30 pawh khan a bial, Aizawl North-II huam chhunga quarantine centre-te a tlawh kual a, veng hrang hranga local task force hruaitute nen an inkâwm. Task force-te hnenah hmanraw chi hrang hrang a pe nghal a ni.