MYC-in ṭhalai thlanbikte an sponsor dawn

March 7, Inrinni khan Mizoram Youth Commission (MYC) chuan Pachhunga Uni­versity College-ah kum 2020-a  UPSC civil ser­vices preliminary exam hmachhawn tura exam form fill-up tawh Mizo ṭhalaite zingah sponsor tur thlanna atan exam an buatsaih.

Dy. chief minister Tawn­luia hoa MYC Chairman, Chief Secretary, Finance Commissioner, Planning Secretary leh  MYC member-te'n an lo rel tawh angin, Mizo ṭhalaite All India Service a tling an pun theihna tura kum 2020 chhunga hmalakna hmasa ber atan UPSC civil services preliminary exam form fill-up tawhte tan Aizawlah exam hi buatsaih a ni a, March 13, 2020 ah New Delhi-ah exam hi buatsaih leh tur a ni.

MYC sponsor tur thlanna exam hi ALS New Delhi-te'n buaipuiin, written, group discussion leh personal interview-te neih a ni. Exam-ah hian mi 38 inlanin March 15, 2020 ah Delhi lama exam-te nen an result tihchhuah a ni ang. Sponsor tur ṭhalai thlanchhuahte lakluhna hun chu March 17, 2020 ah neih tur a ni.