Lok Sabha inthlanpui neih turah Mizoramah voter 7,92,464 an awm

April 11, Ningania Lok Sabha MP inthlanpui awm turah Mizoram pumah voter 7,87,777 an awm a, chu'ng bakah chuan state danga awm, Mizorama vote nei (service voter) 4,687 an awm. Tun ṭum Lok Sabha inthlan tura Mizorama vote thlak thei zawng zawng chu mi 7,92,464 an ni.

Nimin khan Information & Commu­nication Technology department pisaah chief electoral officer (CEO) Ashish Kundra chuan thuthar thehdarhtute a kâwm a; Lok Sabha inthlanpui awm tura vote nei zat hi a sawi a ni.

CEO sawi danin, Mizoram chhunga vote nei mi 7,87,777 zinga 3,83,603 chu mipa an ni a, mi 4,04,169 chu hmeichhia an ni. Mipa aiin hmeichhia vote nei 20,566-in an tam. Voter zingah nihna thlakthleng (transgender) mi panga an awm bawk.

Service voter zingah hian mi 6,634 chu mipa an ni a, 53 chu hmeichhia an ni. Voter zingah pianphunga rualbanlo mi 3,331 an awm a, rualbanlote'n vote an thlak theihna atana ruahmanna ṭha tak siam a ni.

Assembly constituency 40 zinga voter tamna ber chu Tuichawng a ni a, voter 31,470 an awm. Vote tlemna ber constituency - Thorangah voter 13,563 chiah an awm thung.

Tun ṭum Lok Sabha inthlan turah hian polling station 1,175 siam a ni a, lirtheia kal pawh theih loh pakhat a awm. Polling station-a inthlan buaipui turin mi 4,812 ruat an ni a, polling party mi 141 chuan nimin khan an awmna hmun tur an pan a, a bak zawng chuan vawiinah an pan ang.

Venhimna lam buaipui turin mi 4,409 ruat an ni a, chu'ng zinga company 12 chu central armed police force-te niin, a bak zawng chu Mizoram state police an ni.

EVM leh VVPAT a chhiat palha a thlakna turin 470-500 vel ruahman a ni a, chu'ngte chu sectoral officer kutah dah a ni. Sectoral officer atan hian mi 168 ruat an ni a, inthlan laiin polling station hlat lo thei ang bera awmtir an ni dawn.

Ashish Kundra chuan, tun hnai ruahsur vanga inkalpawhnaah harsatna a awm lohna atan DC-te chu PWD, BRTF leh mimal JCB neite be pawp tura tih an nih thu a sawi a, "Leimin vanga polling party-te an khawmuan lohna atan JCB an inrin theihna atan ruahmanna siam a ni," a ti.