Statistical Handbook 2018 tlangzarh a ni

Economics & Statistics (E&S) department-in 'Statistical Handbook Mizoram 2018' leh 'Meteorological Data of Mizoram 2018' an siam tharte chu nimin khan E&S director Lalchhuanawma Hrahsel-in an department conference hall-ah a tlangzarh.

Tlangzarhna inkhawm hi E&S joint director Saithanzuala'n a kaihruai a; director Lalchhuanawma Hrahsel chuan, Mizoram sorkarin Statistical Handbook a tihchhuah ṭhin chu hun hmasa lamah phuisui lo viau mah se, kum 15 vel kal ta aṭangin mumal zawka chhuah a nih thu a sawi a, "Kum khat danah kan tichhuak ṭhin a, kum tinchhuah chu a la harsa deuh. A bu hi kum tin tichhuak lo mah ila, data erawh kum tin a awm a ni," a ti.

Lalchhuanawma Hrahsel chuan, plan siamna turin statistics leh data dik mamawhna a sang tial tial tih sawiin, "Mizoram sorkarin 'One state, One data' tih policy a nei a, chumi tihlawhtling tur chuan theihtawp kan chhuah a bni," a ti a; Statistical Handbook an chhuah thar chu sorkar, pawl, company, sumdawng, research scholar leh mimalte'n ṭangkai taka an hman an beisei thu a sawi.

E&S research officer Ruth Lalrinsangi sawi danin, 'Statistical Handbook Mizoram 2018' hi Mizoram statistical handbook an buatsaih vawi 22-na a ni a, ṭum danga an la tih ngai loh - price statistics leh agricultural report telh a ni. Deputy director B Lalrinhlua chuan, a vawi khatna atan District Domestic Product report an buaipui a, tihchhuah thuai an tum thu a sawi bawk.