MPCC-ZPM-in campaign khâr

MPCC-ZPM Joint Campaign Committee chuan nimin khan Vanapa Hall-ah naktuka Lok Sabha inthlan leh Assembly bye-election neih tura campaign khârna inkhawm an buatsaih.

Lalnghinglova Hmar chuan, Mizoram mipui te, kohhran hruaitute leh rawngbawltu pawimawh te, sorkar hnathawk te, neutral-te leh MNF party mite chu amah vote vek turin a sáwm a; Mizoram mipuite chu vote thlak vek tura sáwmin, "Tun ṭum inthlan hi MP election awm tawh zawng zawnga vote tlak ṭhat ber ṭum ni thei se ka duh hle," a ti.

Lengzem editor Vanneihtluanga pawhin thu sawiin, Mizoram mi­puite chu Mizoram tana theihtawp chhuaha thawk mektu Lalnghinglova Hmar vote turin a sáwm a, "Lalnghinglova Hmar aia mipuite ngainat, kan aiawh atana thlan tur dang an awm chuang lo. Mizo ṭhalaite ngainat, an duh rawn, thu sawi atana kan hman ṭhin a ni," a ti.

Vanneihtluanga chuan, "Lalnghing­lova hi Mizo ṭhalaite kawng dik kawhhmuh tura tlangau turin kan sáwm rawn a, mahni inséngsoin Mizoram dung leh vâng, ram páwn thlengin a zin chuak ṭhin. A thiamna leh theihna zar hi Mizo mipuite'n vawi tam tak kan zo tawh. Tunah hian Mizoram mipui puihna min dil lêt ve ta thung a, kan lo puih ve hi a phû a ni lo'm ni?" a ti a; Mizo mipuite chu Lalnghinglova vote ngei turin a ngen a ni.

Campaign khârna inkhawm hi Zo­nunsangi Fanai-in a kaihruai a, ZPM hruaitute zinga mi Rev.Dr K Thanzauva'n hunserh a hmang. Assembly bye-election-a an candidate Lalbuanga Sailo chu chhungkaw chhhiat tawh vangin a tel thei lo a, a thuchah erawh chhiah chhuah niin, amah vote tura Aizawl West-I bial mipui khawngaihna a ngen thu a ziak a ni.